काठमाडौं । पश्चिम नेपालमा भूकम्पबाट भएको क्षतिको मूल्यांकन र पुनःनिर्माणका लागि सरकारले जाजरकोट, अछाम र बझाङमा प्राधिकरणको अस्थायी समन्वय सम्पर्क कार्यालय स्थापना गर्ने भएको छ ।

बिहीबार सिंहदरबारमा बसेको राष्ट्रिय विपद् जोखिम न्यूनीकरण तथा व्यवस्थापन प्राधिकरण निर्देशक समितिको बैठकले तीन जिल्लामा फागुनभित्रै सम्पर्क समन्वय कार्यालय स्थापना गर्ने निर्णय गरेको गृहमन्त्री रमेश लेखकले जानकारी दिए । 

गृहमन्त्री लेखकले जाजरकोट भूकम्पबाट निजी घरहरूमा भएको क्षतिको क्षति आकलन गर्ने काम द्रुत गतिमा अगाडि बढेको पनि बताए ।

"त्यसपछि हामी पुनः निर्माण र पुनःस्थापनाको काम अगाडि बढाउँछौँ । यसरी नै डोटी र बझाङमा केन्द्रविन्दु भएर गएको भूकम्पको पनि जतिको डीडीए भइसकेको छ, त्यसको पुनःनिर्माण अगाडि बढ्छ । डीडीए हुन नसकेको पनि डीडीए हुन्छ," उनले भने ।