काठमाडौं । नेकपा (एकीकृत समाजवादी)का उपाध्यक्ष जगन्नाथ खतिवडाले देशमा नकारात्मकताको जरो नै प्रधानमन्त्री केपी शर्मा ओली भएको आरोप लगाएका छन् । शुक्रबार (फागुन ९)देखि जारी केन्द्रीय कमिटी बैठकका बारेमा जानकारी दिँदै उनले यस्तो बताएका हुन् ।

प्रधानमन्त्री ओली र सरकारले एकीकृत समाजवादीमाथि आक्रमण गर्ने प्रवृत्तिका विषयमा बैठकमा छलफल भइरहेको उनले उल्लेख गरे । पार्टीलाई सुदृढ र सबल बनाएर लैजाने बारेमा केन्द्रीय कमिटीमा एकमत रहेको उनले सुनाए ।

“...यो देशमा सबै नकारात्मकताको मूल जरो नै उहाँ (केपी ओली) नै हुनुहुन्छ र उहाँले नै यो सब बिगार्नुभएको छ भन्ने कुरामा हामी प्रस्ट नै छौँ,” उनले भने, “तर, सबैको सामूहिक चेतना के छ भने जसले जस्तोसुकै प्रहार गरे पनि पार्टीलाई सबल र सुदृढीकरण गरेर हामी अघि बढ्नुपर्छ भन्ने कुरामा हाम्रो एकमत देखिन्छ ।”

पार्टी प्रवक्ता समेत रहेका खतिवडाले नेतृत्व र केन्द्रीय सदस्यले खेल्नुपर्ने भूमिकाका बारेमा बैठक केन्द्रित भएको बताए । पार्टीलाई जनतासँग जोडेर जनसंघर्षको माध्यमबाट सबल बनाउने प्रस्ताव बैठकमा गरिएको उनले जानकारी दिए ।

निकै जटिल मोडबाट गुज्रिरहेको समसामयिक राजनीतिक चुनौतीको सामना गर्न सक्ने पार्टी एकीकृत समाजवादी नै भएको उनले जिकिर गरे । आफ्नो पार्टीसँग स्वच्छ नेतृत्व र विचारशील नेताहरूको पंक्ति रहेकाले राजनीतिमा देखिएको शून्यतालाई चिर्न सक्ने उनको भनाइ थियो । न्युज एजेन्सी नेपाल