काठमाडौं । गृह मन्त्रालयअन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी प्रमुखका उमेदवारको अन्तर्वार्ता मिति तोकिएको छ । यी पाँच उमेदवारको अन्तर्वार्ता भोलि (माघ ३०) गृह मन्त्रालयमा हुनेछ । पाँचै उमेदवारको अन्तर्वार्ता समय एउटै अर्थात् बिहान ८ बजे निर्धारण गरिएको गृह मन्त्रालयले जनाएको छ ।

प्राधिकरणको कार्यकारी प्रमुखका उमेदवारमा बैतडीका दिनेशप्रसाद भट्ट, डडेलधुराका धर्मराज उप्रेती, कास्कीका वसन्तराज अधिकारी, रोल्पाका मन्दिप सुवेदी र मोरङका सुमनकुमार कर्ण छन् । “...प्राधिकरणको कार्यकारी प्रमुख नियुक्तिका लागि सिफारिस गर्न गठित सिफारिस समितिको बैठक र छनोटसम्बन्धी कार्यविधि २०८१ को दफा १२ को खण्ड (च) को (३) अनुसार अन्तर्वार्ताको लागि...” मन्त्रालयको सूचनामा उल्लेख छ ।

अन्तर्वार्तापछि सम्भावित प्रमुखका नाम सिफारिस गरिनेछ । स्नातकोत्तर उपाधि हासिल गरेको र सम्बन्धित क्षेत्रमा कम्तीमा १० वर्षको अनुभव भएको व्यक्तिलाई सिफारिसअनुसार सरकारले कार्यकारी प्रमुखमा नियुक्त गर्नेछ । कार्यकारी प्रमुखको पदावधि पाँच वर्षको हुने व्यवस्था छ ।

प्राधिकरणको कार्यकारी प्रमुखको जिम्मेवारीमा हाल डा. भीष्मकुमार भूसाल छन् । यही माघ ४ गते गृहमन्त्रीस्तरको निर्णयबाट डा. भूसाललाई अर्को व्यवस्था नभएसम्मका निम्ति प्राधिकरणको कार्यकारी प्रमुखका रूपमा कामकाज गर्ने गरी जिम्मेवारी दिइएको हो ।

यसअघिका कार्यकारी प्रमुख अनिल पोखरेलको पदावधि सकिएपछि पद रिक्त छ । कार्यकाल सकिए वा कुनै कारणले पद रिक्त भएमा नयाँ नियुक्त नहुन्जेलसम्मका निम्ति प्राधिकरणमा कार्यरत वरिष्ठतम सहसचिवलाई कार्यकारी प्रमुखको जिम्मेवारी दिइने व्यवस्था छ ।

“विपद जोखिम न्यूनीकरण तथा व्यवस्थापन ऐन, २०७४ को दफा १० ले राष्ट्रिय विपद् जोखिम न्यूनीकरण तथा व्यवस्थापन प्राधिकरणको व्यवस्था गरिएको छ । प्राधिकरण स्थापना मिति २०७६/०८/२९ गते कार्यकारी प्रमुखको नियुक्ति भएसँगै भएको हो,” प्राधिकरणको वेबसाइटमा उल्लेख छ, “यो प्राधिकरणले विपद् जोखिम न्यूनीकरण तथा व्यवस्थापनसम्बन्धी केन्द्रीय स्रोत निकायको रूपमा कार्य गर्दछ । हाल यसको कार्यालय सिंहदरबार, काठमाडौंमा रहेको छ ।”