काठमाडौं । प्रतिनिधिसभाको आकस्मिक समयमा आइतबार (माघ २७) सांसदहरूले आगलागी/डढेलोका घटनाप्रति ध्यानाकर्षण गराएका छन् । 

नेपाली कांग्रेसका सांसद अर्जुननरसिंह केसीले लाङटाङ राष्ट्रिय निकुञ्ज क्षेत्रको डढेलोबारे सरकारको ध्यानाकर्षण गराए । नुवाकोटको दुप्चेश्वर गाउँपालिकाअन्तर्गतको जंगलमा करिब १० दिनदेखि लागेको डढेलो निभाउन नसकिएको उनले बताए ।

“ठूलो आगलागी (डढेलो) भएको १० दिन हुन लाग्यो, तत्काल सरकारले गम्भीरतापूर्वक सोचोस्,” उनले भने, “यो भेगमा लोपोन्मुख सूचीमा रहेको रेडपान्डा र अन्य वन्यजन्तु, जडीबुटी भएको क्षेत्र हो ।” उनले आगो गाउँबस्तीमा समेत प्रवेश गर्ने अवस्था रहेको सुनाए ।

आगलागीका घटना बढ्न नदिन राष्ट्रिय विपद् जोखिम न्यूनीकरण तथा व्यवस्थापन प्राधिकरणसहित सबै संयन्त्रमार्फत एकीकृत रूपमा काम गरिनुपर्नेमा उनले जोड दिए । आगलागीको जोखिमबारे सचेतना कार्यक्रम आवश्यक रहेको उनले औँल्याए ।

नेकपा (माओवादी केन्द्र)का सांसद हितबहादुर तामाङले पनि दुप्चेश्वर–१ स्थित जंगलको डढेलो नियन्त्रणको पहल नगरिएको बताए । उनले मौसमजन्य समस्या नभएर नियोजित रूपमा त्यहाँ आगो लगाइएको आशंका व्यक्त गरे ।

“दुर्लभ जन्तु रेडपान्डा र मृगको चोरीसिकारी गर्नेहरूको नियोजित ढंगले आगालागी भएको हुनसक्छ । त्यसकारण त्यसको नियन्त्रणका लागि प्रभावकारी कदम चालियोस्,” उनले भने ।

उनले शनिबार खानेपानी मन्त्रालयमा भएको आगलागीबारे सरकारबाट जानकारी गराउन माग गरे ।

नेकपा (एमाले)का सांसद ठाकुर गैरेले शनिबार खानेपानी मन्त्रालयमा कसरी आगलागी भयो भन्ने प्रश्न गरे । “नेपालको राज्य सञ्चालनको केन्द्र, मन्त्रीज्यूको कार्यकक्षमा आगोलागी भयो । यसले हाम्रो सुरक्षा, हाम्रो संवेदनशीलता र सचेतताप्रति प्रश्न उठाएको छ । यो घटना कसरी हुन पुग्यो भन्ने विषय संसद्‌मा जानकारी भयो भने त्यसले एउटा राम्रो सन्देश जाला भनेर ध्यानाकर्षण गर्छु,” उनले भने ।

सांसद गैरेले राष्ट्रिय निकुञ्जमा डढेलोको घटना बढेको पनि बताए । जलवायु परिवर्तनका कारण निम्तने भयावह अवस्था नियन्त्रणका निम्ति सजग हुनुपर्नेमा उनले जोड दिए । सम्भावित विपद्बारे राहत र उद्धारको योजना बनाएर अघि बढ्नुपर्ने उनले ध्यानाकर्षण गराए ।

राष्ट्रिय स्वतन्त्र पार्टी (रास्वपा)की सांसद विन्दवासिनी कंसाकारले देशभर भएको आगलागी/डढेलोका घटना संयोग र दुर्घटना नभएको जिकिर गरिन् । आगलागी नियन्त्रण गर्ने निकायले लापरबाही गरेको उनले आरोप लगाइन् ।

उनले जलनसम्बन्धी गैरसरकारी विधेयक संसद्‌मा पेस गर्न माग गरिन् ।