काठमाडौं । नेकपा (एमाले)का सांसद ठाकुर गैरेले शनिबार खानेपानी मन्त्रालयमा कसरी आगलागी भयो भन्ने प्रश्न गरेका छन् । आइतबार प्रतिनिधिसभा बैठकको आकस्मिक समयमा उनले सिंहदरबारमा आगलागीले सुरक्षा चुनौती थपिएको बताए ।

“नेपालको राज्य सञ्चालनको केन्द्र, मन्त्रीज्यूको कार्यकक्षमा आगोलागी भयो । यसले हाम्रो सुरक्षा, हाम्रो संवेदनशीलता र सचेतताप्रति प्रश्न उठाएको छ । यो घटना कसरी हुन पुग्यो भन्ने विषय संसद्‌मा जानकारी भयो भने त्यसले एउटा राम्रो सन्देश जाला भनेर ध्यानाकर्षण गर्छु,” उनले भने ।

सांसद गैरेले राष्ट्रिय निकुञ्जमा डढेलोको घटना बढेको पनि बताए । जलवायु परिवर्तनका कारण निम्तने भयावह अवस्था नियन्त्रणका निम्ति सजग हुनुपर्नेमा उनले जोड दिए । सम्भावित विपद्बारे राहत र उद्धारको योजना बनाएर अघि बढ्नुपर्ने उनले ध्यानाकर्षण गराए ।

खानेपानीमन्त्री प्रदीप यादवको कार्यकक्षमा शनिबार आगलागी भएको थियो ।