दोलखा । दोलखाको एक सुन्दर पर्यटकीय गन्तव्य हो, शैलुङ । सूर्योदय, सूर्यास्त, आँखैअगाडि सुन्दर हिमालका दृश्य र हुस्सुले ढाकिएका डाँडाहरूको अवलोकनका निम्ति यो प्रसिद्ध छ । हालै निर्मित ‘मिनि ग्रेटवाल’ पनि आन्तरिक पर्यटकका निम्ति आकर्षणको केन्द्र बनेको छ ।

काठमाडौंबाट पूर्वतर्फ १३० किलोमिटरको दूरीमा छ, शैलुङडाँडा । यो दोलखा र रामेछापको संगमस्थल पनि हो । शैलुङ समुद्री सतहबाट तीन हजार २२५ मिटरको उचाइमा अवस्थित छ ।

हरेक मौसममा यहाँ फरक–फरक अनुभव गर्न पाइन्छ । ‘मिनि ग्रेटवाल’सम्म गाडीमा र त्यहाँबाट पैदल जति उकालो लाग्यो त्यति मनै लोभ्याउने डाँडाकाँडा, हिमालका दृश्यले मोहित बनाउँछ ।

यहाँ विस्तारै आन्तरिक र बाह्य पर्यटकका निम्ति सुरक्षित बसोबास एवं खानपानको व्यवस्था हुन थालेको देख्न सकिन्छ । यहाँबाट धौलागिरि, अन्नपूर्ण, मनास्लु, गणेश, लाङटाङ, दोेर्जे लाक्पा, गौरीशंकरलगायत हिमालको दृश्यावलोकन गर्न सकिन्छ ।

निजी सवारीसाधन वा सार्वजनिक बसमार्फत बनेपा, दोलालघाट, मुढे हुँदै शैलुङ जान सकिन्छ । कालापानीमा बास बसेर त्यहाँबाट करिब एक घण्टा हिँडेर शैलुङको चुचुरोमा पुग्न सकिन्छ ।

थप तस्बिर हेर्नोस्–