काठमाडौं । राष्ट्रिय स्वतन्त्र पार्टी (रास्वपा)का उपसभापति स्वर्णिम वाग्लेले संसद्को अघिल्लो अधिवेशन अन्त्यपछिका चार महिना आफ्नो दलका निम्ति अप्रिय रहेको बताएका छन् । प्रतिनिधिसभाको हिउँदे अधिवेशनको पहिलो बैठकमा शुक्रबार उनले यो सुरुआतको स्वागत गर्दै सफलताको शुभकामना दिए ।

“संसद् जनताको आफ्नो घर हो, संवाद र सहमतिको आश्रय पनि हो । कानुन बनाउने र कार्यान्वयन गर्ने कार्यकारिणी मन्त्रिपरिषद्लाई उत्तरदायी बनाउने स्थान पनि हो,” वाग्लेले  भने, “राजनीतिक अनिश्चितता र अड्कलबाजीका बीच नियमित अधिवेशन सुरु हुँदा आशा सञ्चार गर्ने हाम्रो दायित्व पनि हो । घरमा ताल्चा लाएर बाहिर बरालिएको प्रायः हामी नेपाली रुचाउँदैनौँ ।”

ढ्याप ढ्याप समय माग गर्दा नपाएकाले रास्वपाले १५ मिनेट बैठक बहिष्कार गरेका विषयमा उनले स्पष्टीकरण पनि दिए । त्यसलाई उनले ‘ढोका खुलेपछि पिँढीमा बस’ भनेको रूपमा अर्थ्याएका थिए ।

“जनताको ढोका त खुल्यो, तर पिँढीमा मात्र आएर बस भनेजस्तो भएकाले सुसंस्कृत राजनीति गर्ने भनेर आएका हामीले पूर्वाभ्यास ग¥यौँ । यसलाई त्यसै स्पिरिटमा लिइदिन अनुरोध गर्दछु,” उनले भने ।

उनले आफ्नो पार्टी अघिल्लो अधिवेशन अन्त्यपछिका चार महिना कठिन अवस्थाबाट गुज्रिएको उल्लेख गरे । अन्तर्राष्ट्रिय रूपमा पनि नयाँ शक्ति उदय हुँदा चार चरणबाट गुज्रने गरेको उनले बताए । त्यसमा रास्वपा तेस्रो चरणमा रहेको उनको भनाइ थियो ।

“सभामुख महोदय, अघिल्लो अधिवेशन समापनपछिका चार महिना हाम्रो पार्टीका लागि अप्रिय रहेका छन्,” वाग्लले भने, “अन्तर्राष्ट्रिय रूपमा पनि नयाँ शक्तिको उदयपछि चार चरणहरू गुज्रँदा रहेछन् । पहिलो चरण बेवास्ता गरिदिने, दोस्रो चरण खिसीटिउरी गरिदिने, रिडिक्युल गर्ने, तेस्रो चरणमा एट्याक गर्ने, भीषण आक्रमण गर्दिने, अहिले हामी त्यही तेस्रो चरणबाट गुज्रिएको महसुस भइरहेको छ ।”

उनले रास्वपा चौथो चरणमा पुग्ने आत्मविश्वासमा रहेको बताए । “चौथो चरण चाँडै नै आउँदै छ । त्यो भनेको अस्तित्वको स्वीकार्यता, प्रवेश, विस्तार र दिग्विजय हो, त्यो भिक्ट्रीको चरणमा छौँ,” उनले भने, “तेस्रो चरणबाट चौथो चरणमा जानेमा हामी आत्मविश्वासका साथ अघि बढिरहेका छौँ ।”