काठमाडौं । सर्वोच्च अदालतले दुई वर्षअघि नेपाल सरकारमा नाममा जारी गरेको निर्देशनात्मक आदेश कार्यान्वयनको माग गर्दै ब्रिटिस गोर्खा भूतपूर्व सैनिक संगठन (बिगेसो)ले मंगलबार काठमाडौंमा प्रदर्शन गरेको छ ।

अन्यायमा पर्दै आएका ब्रिटिस गोर्खा सैनिकहरूको पक्षमा २४ माघ २०७९ सालमा सर्वोच्च अदालतले गरेको फैसलालाई सरकारले कार्यान्वयन नगरेको भन्दै बिगेसोले काठमाडौंको माइतीघरमा प्रदर्शन गरेको हो ।

सर्वोच्चको फैसला कार्यान्वयन निर्देशनालयबाट ताकेता पत्र पठाउँदा पनि आदेश कार्यान्वयन नगरेकाले प्रदर्शन गर्नुपरेको ब्रिटिस गोर्खा भूतपूर्व सैनिक संगठनका केन्‍द्रीय अध्यक्ष पदमसुन्दर लिम्बूले बताए । 

सन् १९४७ को नोभेम्बर ९ मा नेपाल, भारत र बेलायतबीच भएको त्रिपक्षीय सम्झौताअन्तर्गत भर्ती भएका गोरखा सैनिकहरूमाथि हुँदै आएको अन्याय, असमानता र विभेदका विषयहरूलाई लिएर बिगेसोले संघर्ष गर्दै आएको छ ।

ब्रिटिस गोर्खामाथि भएको विभेदको अन्त्य, त्रिपक्षीय सन्धिको मर्म र भावनानुसार समान पेन्सन, १९४७ को त्रिपक्षीय सन्धिको समयसापेक्ष परिमार्जन नभएसम्म ब्रिटिस सेनामा भर्तीप्रथा स्थगन वा रोक्नुपर्ने भन्दै बिगेसोले संघर्ष जारी राखेको छ ।