काठमाडौं । क्रेस्ट माइक्रोलाइफ इन्स्योरेन्स लिमिटेडले वैदेशिक रोजगारीमा रहेका नेपालीका निम्ति आज (माघ १५)देखि प्राथमिक सेयर (आईपीओ) निष्कासन गरेको छ । यो आईपीओमा वैदेशिक रोजगारीमा रहेका नेपालीले यही माघ २९ गतेसम्म आवेदन दिन सक्नेछन् ।

कम्पनीले निष्कासन गरेको आईपीओमा न्यूनतम १० देखि अधिकतम १० हजार कित्तासम्मका निम्ति आवेदन दिन सकिनेछ ।

कम्पनीले जारी पुँजी ७५ करोड रुपैयाँको ३० प्रतिशतले हुन आउने २२ करोड ५० लाख रुपैयाँबराबरको २२ लाख ५० हजार कित्ता आईपीओ निष्कासन गर्ने अनुमति पाएको थियो । त्यसमध्ये १० प्रतिशतले हुन आउने दुई करोड २५ लाख रुपैयाँबराबरको दुई लाख २५ हजार कित्ता सेयर वैदेशिक रोजगारीमा गएका नेपालीका निम्ति निष्कासन गरिएको हो ।

वैदेशिक रोजगारीमा रहेका नेपालीले नेपाल धितोपत्र बोर्डबाट स्वीकृति प्राप्त सम्पूर्ण आस्बा सदस्य बैंक तथा वित्तीय संस्था र तिनका तोकिएका शाखा कार्यालय तथा सीडीएस एन्ड क्लियरिङ लिमिटेडबाट निर्मित सफ्टवेयर मेरोसेयर अनलाइनमार्फत आवेदन दिन सक्नेछन् ।