काठमाडौं । प्रधानमन्त्री केपी शर्मा ओलीले मुलुकको विकास गर्नु ख्यालठट्टाको कुरा नभएको बताएका छन् ।

सोमबार भक्तपुरको सूर्यविनायक नगरपालिकाको प्रशासकीय भवनको उद्घाटन गर्दै प्रधानमन्त्री ओलीले यस्तो बताएका हुन् । उनले मुलुक आर्थिक र सामाजिक रूपमा अफ्ठ्यारोमा परेको कारण संसद्का दुई ठूला दल मिलेर सरकार बनेको स्पष्ट पारे ।

उनले नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड' नेतृत्वको सरकारले मुलुकको आर्थिक ढुकुटी रित्याउने काम गरेको आरोप लगाए । मुलकमा ऋण बढ्दै गएको तर आयको सबै बाटोहरू बन्द भएको कारण वर्तमान सरकार गठन भएको जिकिर गरे । केही अराजक तत्वहरूले तमासा गरिरहेको उल्लेख गर्दै मिडियाबाजीले राजनीति नहुने उल्लेख गरे ।

मुलुकलाई स्थिरता र स्थायित्वको बाटोमा लैजान वर्तमान सरकार बनेको दोहोर्‍याउँदै उनले कसैले बिलौना गर्दैमा सरकार नढल्ने बताए ।

यस्तो छ प्रधानमन्त्री ओलीको भनाइ–
२०४६ सालको बहुदलीय व्यवस्था भएपछि मुलुकको विकास किन भएन ? गर्ने खालको पार्टी सरकारमा भयो भने देशको विकास हुन्छ नत्र हुँदैन । एकदम सही हो त्यो । तपाईंहरू एकदम ढुक्क किन हुनुहुन्छ अहिले ? अस्ति तीन वर्ष पनि सरकार थियो । अबको तीन वर्ष पनि सरकार जान्छ, के भयो र ? त्यस्तो होइन । अस्ति तीन वर्षको सरकारले मुलुकलाई रषातलमा पु¥यायो । ढुुकुटी रित्यायो । तिर्नुपर्ने ठाउँ सबै बाँकी आउनुपर्ने ठाउँ कतै पनि छैन । त्यस्तो बनायो । अहिले नेपाली कांग्रेस र नेकपा एमाले दुई वटा प्रतिस्पर्धी भनिएका पार्टीहरू किन मिलेर जानुप¥यो । यसकारण कि देश साच्ची अप्ठ्यारोमा पर्यो । देशै रहन्छ कि रहदैन, प्रणाली नै रहन्छ कि रहदैन भन्ने स्थितिमा देश पुगिसक्यो । अनि अनेकथरि तत्वहरु यो देशमा तमासा गरेजस्तो भयो । यताबाट फुत्किएर एउटा झिल्केले चटकबाजी देखाउँछ, के–के भन्छ ? उफ्रिन्छ । मिडियाबाजी गर्छ, अनेक गर्छ । अर्कोतिरबाट अर्को निस्किन्छ । उ पनि त्यस्तै गर्छ । देश बनाउनु कुनै ख्यालठट्टाको कुरा हो र ? मजाकको कुरा हो र ? किन नेकपा एमाले र कांग्रेस एकठाउँमा बस्नुपर्यो भने देश र लोकतन्त्रलाई अप्ठ्यारोबाट मुक्त गर्दै लोकतन्त्रलाई सुदृढ बनाउन गठन भएको हो । सबैले सुन्नेगरी भन्छु । आजै ढल्छ, भोलि बिहान ढलेको हुन्छ भन्ने छाती पिटाइ र कपाल लुछाइको केही अर्थ छैन । सरकार ढल्छ भनेर आफ्नै छाती र कपाल लुछाई गर्ने विलौनाको केही अर्थ छैन । झन्डै दुईतिहाइका दुई पार्टीले संकल्प गरेका छन् । अब देशलाई यसप्रकारको खेलवाडबाट गुज्रन दिन सकिँदैन । अब देशलाई स्थायित्व र स्थिरता दिएर बलियो र विकसित बनाउने प्रतिबद्धता गरेका छौँ । यदि कांग्रेस र एमाले मिलेर बनेको सरकारले पनि मुलुकको विकास गर्न सकेन भने अनि विकल्प कहाँ रह्यो । त्यसपछिको निराशा भयानक हुन्छ ।