काठमाडौं । नेपाली कांग्रेसका सभापति शेरबहादुर देउवाले एमसीसीको विरोध गर्नेहरूलाई समेत स्वीकार गरेपछि राम्रो रहेछ भन्ने थाहा भएको बताएका छन् । 

नेपाली कांग्रेसको आर्थिक नीति तथा योजना विभागले गरेको नेपालको सन्दर्भमा वैदेशिक सहायताको उपयोगका विषयमा गरेको कार्यक्रममा सभापति देउवाले राजनीतिक दलहरूले गरेका विरोधले नेपालमा कस्तो ऋण लिने र कति लिने भन्ने सन्दर्भमा प्रस्टता ल्याउन सहयोग पुगेको बताए । 

“हाम्रो देश भारत र चीनको बीचमा छ । त्यहाँको नीतिको असर यहाँ देखिन सक्दछ । त्यसको फाइदा/बेफाइदा पनि हामीलाई समय अनुसार हुन सक्छ,” देउवाले भने, “एमसीसी पास गर्ने बेलामा हाम्रोमा धेरै ठूलो विरोध भयो । तर, पार्लियामेन्टले पास गरेपछि अहिले धेरैलाई थाहा भयो कि त्यो धेरै राम्रो प्रोजेक्ट रहेछ भन्ने ।” उनले त्यसलाई ऋणमा आएको हो भन्नेहरूले पनि अनुदान हो भन्ने अहिले थाहा पाइसकेको बताए । 

उनले नेपालले अहिलेसम्म धेरै ऋण वल्र्ड बैंक, एसियाली बैक, अन्तराष्ट्रिय मुद्रा कोष आइएमएफमार्फत लिएको बताए । उनले जाइकामार्फत जापान सरकारको ऋण लिएको भन्दै त्यो पनि अनुदानमा परिणत हुने गरेको बताए ।
 
उनले कांग्रेसको आर्थिक नीति तथा योजना विभागका प्रमुख प्रा.डा. गोविन्दराज पोखरेलले महत्त्वपूर्ण छलफल राखेको भन्दै यसले आफूसहित नेपालीहरूलाई धेरै कुरा बुझ्न सहयोग पुगेको बताए ।