काठमाडौं । मधेस प्रदेशका मुख्यमन्त्री सतिशकुमार सिंहले मधेसलाई अधिकारसम्पन्न बनाउन अझै संघर्ष जरुरी रहेको बताएका छन् ।

१८औँ ‘बलिदानी दिवस’का अवसरमा शनिबार जनकपुरमा आयोजित एक कार्यक्रममा उनले मधेस आन्दोलनको बलमा मुलुकले संघीयता पाएको जिकिर गरे । बाँकी अधिकार प्राप्तिका निम्ति अझै संघर्ष जरुरी रहेकामा उनले जोड दिए ।

प्राप्त उपलब्धिलाई संस्थागत गर्दै चरणबद्ध रूपमा बाँकी अधिकारका निम्ति संघर्ष गर्नुपर्ने उनले बताए ।

मुख्यमन्त्री सिंहले मधेस आन्दोलनको बलमा मुलुक संघीयतामा प्रवेश गरे पनि प्रहरी प्रशासन र ठूलठूला काम गर्न संघकै मुख ताक्नुपर्ने बाध्यताका कारण समस्या सिर्जना भइरहेको गुनासो गरे ।

उनले सहिदका परिवारको सम्मानमा प्रदेश सरकारले कुनै कमी नराख्ने प्रतिबद्धता जनाए । सहिद परिवारका निम्ति रोजगारीको सिर्जना गर्न कानुनै बनाएर अगाडि बढ्ने उनले उल्लेख गरे । हिमालयन टेली भ्वाइस