site stats
बाह्रखरी :: Baahrakhari
विदेश
Global Ime bankGlobal Ime bank
इरानको सर्वोच्च अदालतमा गोली हानी दुई न्यायाधीशको हत्या

तेहरान । तेहरानस्थित सर्वोच्च अदालतको भवनमा शनिबारको गोलीकाण्डमा दुई न्यायाधीशको मृत्यु भएको छ ।

“सर्वोच्च अदालतका तीन न्यायाधीशलाई निसाना बनाइएको आक्रमणमा परी तीमध्ये दुईजनाको मृत्यु भएको छ,” न्यायपालिकाको मिजान अनलाइन वेबसाइटमा जारी विज्ञप्तिमा उल्लेख छ । आक्रमणकारीले घटनालगत्तै आत्महत्या गरेको विज्ञप्तिमा जनाइएको छ ।

सरकारी समाचार संस्था इर्नाले पनि आक्रमणमा परी न्यायाधीशको मृत्यु र अर्का एक न्यायाधीश घाइते भएका जनाएको छ ।

मिजानले मारिएका दुई न्यायाधीश अली रजिनी र मोहम्मद मोगिसेह रहेका जनाएको छ । उनीहरूले ‘राष्ट्रिय सुरक्षा, जासुसी र आतंकवादविरुद्धको अपराधसम्बन्धी’ मुद्दा हेर्न गरेको पनि जनाइएको छ ।

उनीहरूको हत्याको कारण तत्काल स्पष्ट भएको छैन । मिजानले आक्रमणकारीको पहिचानबारे थप जानकारी नदिई सर्वोच्च अदालतमा कुनै पनि मुद्दामा उनीहरूको संलग्नता नरहेको उल्लेख गरेको छ । मिजानका अनुसार, घटनाको अनुसन्धान सुरु गरिएको अधिकारीहरूले बताएका छन् ।

अमेरिकी अर्थ मन्त्रालयका अनुसार, ६८ वर्षीय वरिष्ठ न्यायाधीश मोगिसेहलाई सन् २०१९ मा संयुक्त राज्य अमेरिकाले ‘अनगिन्ती अनुचित मार्गको निरीक्षण गरेको’ भनी प्रतिबन्ध लगाएको थियो । इरानले त्यो आरोपको खण्डन गरेको थियो । 

मिजानका अनुसार, ७१ वर्षीय रजिनीले इरानको न्यायपालिकामा धेरै महत्त्वपूर्ण पद सम्हालिसकेका थिए । यसअघि, सन् १९९८ मा आक्रमणकारीले उनको गाडीमा म्याग्नेटिक बम राखी हत्या प्रयास गरेका थिए । 

इरानमा न्यायाधीशलक्षित आक्रमण विरलै घटना हो । तर, पछिल्ला वर्षहरूमा उच्चपदस्थ व्यक्तिहरूलाई लक्षित गरी थुप्रै गोलीकाण्ड भएको छ ।

गएको अक्टोबरमा दक्षिणी सहर काजेरुनमा शुक्रबारको नमाजको नेतृत्व गरिरहेका एक शिया मुस्लिम उपदेशकको गोली हानी हत्या गरिएको थियो ।

सन् २०२३ को अप्रिलमा उत्तरी प्रान्त मजन्दरानको एक बैंकमा अब्बास अली सुलेमानी नाम गरेका शक्तिशाली धर्मगुरुको गोली हानी हत्या गरिएको थियो ।

सन् २००५ को अगस्टमा तेहरानको एक व्यस्त व्यापारिक क्षेत्रको बीचमा दुई बन्दुकधारीले प्रसिद्ध इरानी न्यायाधीश हसन मोघदासको हत्या गरेका थिए । उनको हत्यामा दोषी ठहर भएका दुईजनालाई दुई वर्षपछि फाँसी दिएर सार्वजनिक रूपमा मृत्युदण्ड दिइएको थियो । रासस/एएफपी

प्रकाशित मिति: शनिबार, माघ ५, २०८१  १७:३३
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
Shivam Cement DetailShivam Cement Detail
सम्पादकीय
Hamro patroHamro patro