सिड्नी । लोकप्रिय गायक शिव परियार र नेपाल आइडलका विजेता प्रतिभाशाली कलाकार करण परियारले सिड्नीमा आफ्नो प्रस्तुति दिने भएका छन् । 

पाल्पा इन्टरटेन्टमेन्ट्सको आयोजनामा आउँदो फेब्रुअरी १४ तारिखमा सिड्नीको ग्रानभिलस्थित रातोघरमा उनीहरूले विशेष प्रस्तुति दिने आयोजक सुवास थापाले बताएका छन् ।  

दर्जनौँ हिट गीत पस्केका शिव परियार र युवा गायक करणको विशेष प्रस्तुतिले सिड्नी एकपटक फेरि घन्किने भएको छ । साथमा नेपाल आइडलकी फर्स्ट रनर अप सलोमी गुरुङ र झरना रिसालको प्रस्तुति पनि रहनेछ । 

‘पिलायो साथीले’, ‘नभेटी नभेटी’, ‘आँसुको अर्थ’जस्ता कालजयी गीत पस्केका शिव नेपाली गीत–संगीतका अलग र फरक धारका स्वादिला गायकका रूपमा चिनिन्छन् । 

यस्तै, नेपाल आइडलमार्फत उदाएका करण परियारको विशेष प्रस्तुति कार्यक्रमको अर्को महत्त्वपूर्ण पाटो रहेको छ । आइडलबाटै उदाएका बर्दियाका यी युवकको संघर्ष र गायनको रोचक र चाखलाग्दो विशेषता रहेको छ ।

‘‘हामीले यसपटक दर्शकदीर्घाको सांगीतिक स्वादलाई विशेष ध्यान दिएर नेपाल आइडल विथ शिव परियार कार्यक्रम आयोजना गर्न लागेका हौँ,’’ आयोजक सुवासले सुनाए । 

कार्यक्रमलाई एटुजेड क्लिनिङ सप्लाईले मुख्य प्रायोजन गर्ने भएको छ भने एक्सप्रेस एयरकन्डेसनिङको विशेष सहयोग रहेको छ ।