काठमाडौं । विद्युत् नियमन आयोगले अनलाइन सफ्टवेयरमा आधारित ‘डकुमेन्ट म्यानेजमेन्ट सिस्टम (डीएमएस)’ सञ्चालनमा ल्याएको छ ।

सेवाग्राहीलाई सहज, छिटो, छरितो र प्रभावकारी बनाउन डीएमएस सञ्चालनमा ल्याएको हो । आयोगले प्रदान गर्ने सेवा अनलाइनमार्फत हुनेछ । बुधबार एक कार्यक्रमबीच ऊर्जा, जलस्रोत तथा सिँचाइमन्त्री दीपक खड्काले उक्त प्रणालीको शुभारम्भ गरे ।

डीएमएस प्रणालीले आयोगमार्फतप्रदान गरिने सार्वजनिक सेवा प्रवाहलाई प्रविधिमैत्री बनाई गुणस्तरीय, जिम्मेवार तथा जवाफदेही बनाउन मद्दत गर्ने अध्यक्ष रामप्रसाद धितालले जानकारी दिए ।

उक्त प्रणाली लागु भएसँगै अनुमतिपत्र सेयरको सार्वजनिक निष्कासन, विद्युत् खरिद बिक्री सम्झौता लगायतका सम्पूर्ण काम कारबाही अनलाइन माध्यमबाटै हुने धितालले जनाए ।

कार्यक्रममा बोल्दै स्वतन्त्र ऊर्जा उत्पादकहरूको संस्था, नेपाल (इप्पान)का अध्यक्ष गणेश कार्कीले विद्युत् नियमन आयोगले अझै नियमनकारी भूमिका खेल्न जरुरी रहेको बताए । उनले नेपाल विद्युत् प्राधिकरणलगायत ऊर्जा मन्त्रालय मातहत रहेका निकायहरूलाई नियमन गर्न जरुरी रहेको बताए ।

सन् २०३५ सम्म २८ हजार ५०० मेगावाट विद्युत् उत्पादन गर्ने सरकारको निर्णय ऐतिहासिक भएको समेत बताए ।