काठमाडौं । प्रधानमन्त्री एवं नेकपा (एमाले)का अध्यक्ष केपी शर्मा ओलीले इजरायल–प्यालेस्टाइनबीचको समस्या समाधान गर्न ‘दुई राज्य समाधान’ प्रस्तावलाई समर्थन गर्ने बताएका छन् । आइतबारदेखि च्यासलमा सुरु पार्टीको केन्द्रीय कमिटीको आठौँ बैठकमा राजनीतिक प्रतिवेदन प्रस्तुत गर्दै उनले उक्त प्रस्तावलाई समर्थन गर्ने जनाएका हुन् ।

“प्यालेस्टाइनी जनताको स्वतन्त्र र सार्वभौम राज्यको मागप्रति हाम्रो निरन्तर समर्थन रहँदै आएको छ । स्वीकृत अन्तर्राष्ट्रिय सीमाभित्र इजरायल र प्यालेस्टाइन शान्तिपूर्वक रहन पाउनुपर्छ भन्ने संयुक्त राष्ट्रसंघको ‘दुई राज्य समाधान’को प्रस्तावलाई हामी समर्थन गर्छौँ,” ओलीको राजनीतिक प्रतिवेदनमा उल्लेख छ ।

‘दुई राज्य समाधान’ विकल्पको कार्यान्वयनबाट मात्र त्यस क्षेत्रमा दिगो शान्ति कायम हुन सक्ने विश्वास उनले व्यक्त गरेका छन् ।

जुनसुकै स्वरूप, आवरण र नाममा गरिने आतंकवादी क्रियाकलापको एमालेले दृढ विरोध गर्ने उनले जनाएका छन् । “हामी त्यस क्षेत्रमा तत्काल युद्धविराम गर्न, नेपाली युवा विपीन जोशीसहित सबै बन्धकहरू रिहा गर्न, मानवीय सहायताको आपूर्तिलाई निर्बाध सञ्चालन गर्न र हत्याहिंसाको अमानवीय शृंखला तत्काल अन्त्य गर्न माग गर्दछौँ,” ओलीले राजनीतिक प्रतिवेदनमा भनेका छन् ।