काठमाडौं । चिनियाँ विद्युतीय सवारी निर्माता बीवाईडीले आफ्ना कर्मचारीको संख्या दश लाख पुगेको बताएको छ । बीवाईडीका संस्थापक एवं अध्यक्ष वाङ चुआनफुले यस्तो बताएका हुन् ।

उनले बीवाईडीसँग एक लाख दश हजार इन्जिनियर र ११ वटा प्रमुख अध्ययन संस्थान रहेको बताएका छन् ।

चाइना सेन्ट्रल टेलिभिजनले आयोजना गरेको पहिलो इन्नोभेसन एन्ड टेक्नोलोजी फेस्टिभलमा उनले यस्तो दाबी गरेका हुन् । बीवाईडीले रिसर्च एन्ड डेभलपमेन्ट (आरएन्डडी)मा अन्य अटो निर्माता कम्पनीभन्दा उच्च कर्मचारी रहेको बताएका छन् ।

सन् २०११ मा बीवाईडीमा २० हजार इन्जिनियर रहेको बताइएको छ । हाल त्यो संख्या एक लाख दश हजार पुगेको हो ।

सन् २०२२ मा कम्पनीमा कुल कर्मचारी पाँच लाख ७० हजार रहेकोमा हाल करिब दश लाख पुगेको बीवाईडीका अध्यक्ष वाङ चुआनफुले बताएका हुन् ।

कम्पनीले पछिल्लो तीन वर्षमा ५० हजार कलेज ग्र्याजुएटलाई रोजगारी दिएको जनाएको छ । जसमा बढीजसो मास्टर्स र पीएचडी गरेका विद्यार्थी थिए । उनीहरूमध्ये ८० प्रतिशत आरएन्डडीतर्फ कार्यरत छन् ।

कम्पनीले सन् २०२४ को बिक्री ३६ लाखको लक्ष्यभन्दा बढी ४२ लाख ७० हजार पुग्ने बताएको छ ।