काठमाडौं । आकाशमा बेलाबेला फरक र रोमाञ्चक घटना हुने गर्छ । विगतमा झैँ सन् २०२५ मा पनि खगोलीय घटना हेर्न रुचाउनेले त्यो अवसर प्राप्त गर्नेछन् । यस्ता घटनामा चन्द्रमाले छोपिएको चम्किलो मंगल ग्रह, निकै धेरै चम्किलो शुक्र, सूर्यग्रहण, उल्का वर्षालगायत गतिविधि हुनेछन् ।

यी घटना नांगो आँखाले नै देख्न सकिन्छ । तर, दूरबिन वा सामान्य टेलिस्कोपले झन् राम्रो देखाउने अपेक्षा गरिएको छ ।

जनवरी ३ को उल्का वर्षा
आउँदो जनवरी ३ को राति क्वाड्रन्टिड उल्का वर्षा हुनेछ । जाडोयाममा हुने हुँदा उत्तरी गोलार्धका स्काइवाचर्सले बेवास्ता गर्ने क्वाड्रन्टिड उल्का वर्षाका क्रममा प्रतिघण्टा १२० भन्दा बढी तारा खसेको देखिने बताइएको छ । आकाश सफा रहेमा यो राम्रो अनुभव हुने ठानिएको छ ।

मंगल र पूर्ण चन्द्रमा
सोही जनवरीभरि मंगल ग्रह निकै चम्किलो देखिनेछ । उक्त अवधिमा चन्द्रमा मंगल ग्रहको नजिक देखिनेछ । तर, खासगरी उत्तरी अमेरिकाबाट पूर्ण चन्द्रमाको पछाडि रातो मंगल ग्रह हराएको देखिने बताइएको छ । यो घटना जनवरी १३ को राति हुनेछ ।

पृथ्वीको सबैभन्दा नजिक चन्द्रमा
जनवरी १५ मा मंगल ग्रह पृथ्वीको सबैभन्दा नजिक आइपुग्नेछ । यो घटना हरेक २६ महिनामा हुन्छ । सूर्यको परिक्रमा गर्ने क्रममा आफ्नो एक चक्र पूरा गर्दा पुग्ने यो विन्दुलाई ‘अप्पोजिसन’ पनि भनिन्छ । यो दिन पृथ्वी मंगल ग्रह र सूर्यको बीचमा पर्छ ।

अत्यधिक उज्यालोमा शुक्र
आउँदो फेब्रुअरी १९ को दिन साँझको तारा अथवा शुक्र ग्रह पृथ्वीको सबैभन्दा नजिक हुनेछ । यो दिन पातलो अर्धचन्द्राकार आकारमा शुक्र ग्रह चम्किलो अवस्थामा देखिनेछ ।

लिरिड उल्का वर्षा
अप्रिल २१ र २२ को राति लिरिड उल्का वर्षा देख्न सकिनेछ । यो उल्का वर्षाका क्रममा प्रतिघण्टा १० देखि २० तारा खसेको देखिनेछ । भित्री सौर्यमण्डलमा सी/१८६२ जी१ धूमकेतु (कमेट)ले छाडेको धुलो र टुक्राले यो उल्का वर्षा गराउने भएको हो ।

एटा अक्वैरिड्स उल्का वर्षा
हेलिज धूमकेतुले छाडेको धुलो तथा कणका कारण मे ६ र ७ को राति एटा अक्वैरिड्स उल्का वर्षा हुने भएको छ । यसमा दक्षिणी गोलार्धमा प्रतिघण्टा ६० तारा खसेजस्तो देखिनेछ । उत्तरी गोलार्धबाट यो केही कम देखिनेछ । सन् १९८६ मा सौर्यमण्डलको भित्री भागमा देखिएको हेलिज धूमकेतु फेरि २०६१ मा देखा पर्ने अपेक्षा गरिएको छ ।

यसबाहेक सन् २०२५ जुलाई २० को बिहान चन्द्रमा एक हजारभन्दा बढी ताराको समूह प्लेइडिजसँग देखिनेछ । यस्तै, जुलाई २८ र २९ को राति डल्टा एक्वेरिड उल्का वर्षा, अगस्ट १२ मा शुक्र र वृहस्पतिको संयोजनजस्ता घटना हेर्न सकिनेछ ।

२०२५ कै अक्टोबर ७, नोभेम्बर ५ र डिसेम्बर ४ मा गरी तीनपटक ‘सुपरमुन’ देख्न सकिनेछ । परिक्रमाका क्रममा पृथ्वीको नजिक पुगेर पूर्ण रूपमा सामान्य दिनभन्दा ठूलो देखिने बेलाको चन्द्रमालाई सुपरमुन भनिन्छ । स्पेसडटकमबाट ।