काठमाडौं । ब्रान्डन म्याकमुलमको अर्धशतकप्रेरित सुदूरपश्चिम रोयल्सले नेपाल प्रिमियर लिग (एनपीएल)मा काठमाडौं गुर्खाजसामु १६८ रनको लक्ष्य प्रस्तुत गरेको छ । बिहीबार कीर्तिपुरस्थित त्रिवि क्रिकेट मैदानमा टस हारेर ब्याटिङमा उत्रिएको सुदूरपश्चिमले निर्धारित २० ओभरमा ६ विकेट गुमाएर १६७ रन बनाएको हो ।

सुदूरपश्चिमका म्याकमुलमले ५३ रन बनाए । उनले ३६ बलमा तीन चौका र चार छक्का प्रहार गरे । म्याकमुलमलाई १२औँ ओभरको अन्तिम बलमा गेरहार्ड इरास्मसले साहब आलमबाट क्याच गराए ।

ओपनर विनोद भण्डारीले २८ बलमा दुई चौका र दुई छक्कासहित ३५ रन थपे । १७–१ को स्थितिबाट विनोद र म्याकमुलमले ११४ रनको शतकीय साझेदारी गर्दै सुदूरपश्चिमलाई १०३–२ को बलियो अवस्थामा पुर्‍याएका थिए ।

विनोदलाई साहबले १३औँ ओभरको पहिलो बलमा एलबीडब्ल्यूको धरापमा पारे ।

कप्तान दीपेन्द्रसिंह ऐरीले ४३ रन बनाए । १९औँ ओभरको चौथो बलमा आउट भएका दीपेन्द्रले २५ बलमा तीन चौका र दुई छक्का प्रहार गरे । दीपेन्द्रलाई करण केसीले माइकल लेभिटनबाट क्याच गराए ।

ओपनर सैब जैबले ११ रन थपे । नौ बलमा एक छक्का प्रहार गरेका जैबलाई दोस्रो ओभरको अन्तिम बलमा राशिद खानले बोल्ड गरेका थिए । सस्तैमा आउट भएका रोहन मुस्ताफालाई राशिदले नै १६औँ ओभरको अन्तिम बलमा बोल्ड गरे । मुस्ताफाले चार रन जोडे ।

१७औँ ओभरको चौथो बलमा रनआउट हुनुअघि आरिफ शेखले तीन बलमा तीन रन मात्र बनाए ।

काठमाडौंका राशिद खानले दुई विकेट लिए । करण केसी, साहब आलम र गेरहार्ड इरास्मसले समान एक विकेट लिए ।