काठमाडौं । राष्ट्रिय योजना आयोगमा मुख्य सचिव सरहको जिम्मेवारी तोकिएका डा. वैकुण्ठ अर्यालले राजीनामा दिएका छन् । 

आयोगमा विशेष पद सिर्जना गरेर प्रधानमन्त्री तथा मन्त्रिपरिषद्को कार्यालयबाट सरूवा भएका थिए । अर्यालले आइतबार प्रधानमन्त्री तथा मन्त्रिपरिषद्को कार्यालयमा राजीनामा दिएका हुन् ।

उनलाई भ्रष्टाचार मुद्दामा अख्तियार दुरुपयोग अनुसन्धान आयोगले विशेष अदालतमा मुद्दा चलाएको थियो । सफाइ पाएपछि पहिलोपटक आइतबार उनी योजना आयोगमा हाजिर भएका थिए । 

प्रधानमन्त्री तथा मन्त्रिपरिषद् कार्यालय स्रोतका अनुसार आइतबार (आज)को मन्त्रिपरिषद् बैठकमा अर्यालको राजीनामा पेस गरिएन । आगामी मन्त्रिपरिषद् बैठकमा भने उनको राजीनामा पेस हुने बताइएको छ ।

आजको मन्त्रिपरिषद् बैठकमा पूर्वसभामुख दमनाथ ढुंगानाको शोकको विषयमा मात्रै छलफल भएको स्रोतको भनाइ छ ।