काठमाडौं  । कीर्तिपुर नगरपालिकाको मेयरमा नेकपा (माओवादी केन्द्र)का शिवशरण महर्जनले उमेदवारी दर्ता गराएका छन् । 

कीर्तिपुर अस्पतालनजिक स्थापित निर्वाचन अधिकृतको कार्यालयमा पुगेर आइतबार उनले उमेदवारी दर्ता गराएका हुन् ।

कीर्तिपुरमा माओवादी केन्द्र र अशोक राई नेतृत्वको जसपाबीच चुनावी गठबन्धन भएको छ । कीर्तिपुरको मेयर पदमा नेकपा (माओवादी केन्द्र)का तर्फबाट उमेदवारी दिएका महर्जनलाई एकीकृत समाजवादीले पनि समर्थन गर्ने सहमति भएको छ ।

त्यस्तै, कीर्तिपुर नगरपालिका वडा नं १ मा जसपाबाट सरल गोपाल महर्जन र वडा नं ४ मा माओवादी केन्द्रबाट नारायण विष्टले उमेदवारी दर्ता गराएका छन् । 

स्थानीय तहका रिक्त ४२ पदका निम्ति यही मंसिर १६ गते उपनिर्वाचन हुँदै छ ।