काठमाडौं । राष्ट्रिय स्वतन्त्र पार्टी (रास्वपा)मा कीर्तिपुर नगरपालिकाको मेयर पदको उमेदवारका लागि जयराम कार्कीको मात्रै उमेदवारी परेको छ । रास्वपाले माग गरेको प्रारम्भिक उमेदवारीमा पार्टीको कीर्तिपुर नगर सभापति कार्कीले मात्रै दाबी गरेका छन् । 

रास्वापाले बुधबार उपनिर्वाचनका निम्ति १७ स्थानको उमेदवारको नाम प्रकाशन गरेको छ । तर, मेयर उमेदवारका लागि एकल दाबी परे पनि कीर्तिपुरको मेयर उमेदवारको नाम सार्वजनिक गरिएको छैन । 

एकल दाबी परे पनि कीर्तिपुरमा किन निर्णय भएन भनि बाह्रखरीले उपनिर्वाचन केन्द्रीय संयोजन समितिका संयोजक गणेश पराजुलीलाई प्रश्न गरेको छ । उनले उक्त क्षेत्रको उपनिर्वाचन परिचालन समितिले निर्णयका लागि समय माग गरेको बताए । 

“सम्बन्धित क्षेत्रको निर्वाचन परिचालन समितिले केही तयारी गरिरहनु भएको होला । टुंग्याउन केही समय माग्नुभएको छ,” उनले भने । 

प्रारम्भिक रूपमा उमेदवारी आह्वान गर्दा एकल उमेदवारी परेको र सम्बन्धित समितिले निर्णय गरेपछि मात्रै सार्वजनिक गरिने पराजुलीले बताए ।

रास्वपा नेतृत्वले कीर्तिपुरमा यसअघि प्रतिनिधिसभातर्फ काठमाडौं क्षेत्र नम्बर–१० मा पराजित भएका पार्टीको काठमाडौं जिल्ला संयोजक प्रदीप विष्टलाई उमेदवार बनाउन चाहेको थियो । तर, संघमा उमेदवार भइसकेको व्यक्ति नगरमा जान उपयुक्त नहुने आवाज उठेपछि उनी पछि हटेको एक नेताले बताए । 

तथापि, संघीय निर्वाचनमा कीर्तिपुरबाट नेपाली कांग्रेसको भन्दा बढी मत पाएका विष्टलाई नै उमेदवार बनाउनुपर्ने मत रास्वपामा कायम नै छ । “उमेदवार तय गर्न विभिन्न विकल्पमा छलफल गरिरहेका छौँ । प्राइमरी इलेक्सन नभएको ठाउँमा मंसिर २ गते बिहानसम्म निर्णय आउँदासम्म फरक पर्दैन,” एक नेताले बाह्रखरीसँग भने ।

आउँदो मंसिर १६ गते ४२ स्थानीय तहको रिक्त पदका लागि उपनिर्वाचन हुँदै छ । त्यसका लागि मंसिर २ गते उमेदवारी दर्ताको कार्यक्रम छ ।