काठमाडौं । नेपाली कांग्रेस संसदीय दलका प्रमुख सचेतक श्यामकुमार घिमिरेले अख्तियार दुरुपयोग अनुसन्धान आयोगलाई निजी क्षेत्रमा प्रवेश गर्न दिन नहुने बताएका छन् । प्रतिनिधिसभाअन्तर्गतको राज्यव्यवस्था तथा सुशासन समितिको सोमबारको बैठकमा उनले अख्तियारले निजी क्षेत्र हुँडल्ने काम मात्र गर्ने टिप्पणी गरे ।

अख्तियारको प्रवेश भए निजी क्षेत्र झन् कमजोर हुने उनले तर्क गरे । “अख्तियारले सरकारी क्षेत्र हेर्न नसकेको अवस्थामा निजी क्षेत्र हुँडल्ने काम गर्छ,” उनले भने, “निजी क्षेत्र झन् कमजोर भएर जान्छ ।”

सरकारको लगानी मात्र अख्तियारले हेर्नु उचित हुने उनले धारणा राखे । “सरकारको मातहतमा रहेको र सरकारको लगानी मात्रै अख्तियारले हेर्नुपर्छ,” उनले भने, “निजी क्षेत्रलाई अख्तियारको दायरामा नल्याऔँ ।”

अख्तियार दुरुपयोग अनुसन्धान आयोग ऐन, २०४८ लाई संशोधन गर्न बनेको विधेयकका विषयमा बैठकमा छलफल गरिएको हो ।