काठमाडौं । शुक्रबार प्रमुख प्रतिपक्षी दलका नेता पुष्पकमल दाहाल ‘प्रचण्ड’ले विपक्षी गठबन्धनको बैठक राखेका थिए । बैठकमा विपक्षमा रहेका राष्ट्रिय स्वतन्त्र पार्टी (रास्वपा) र नेकपा एकीकृत समाजवादीसँगै उनले सत्तारुढ दलका नेता महन्थ ठाकुरलाई समेत बैठकमा डाकेका थिए ।
ठाकुरलाई भने विपक्षी गठबन्धनको बैठक नभनी केही नेताहरूबीच छलफल गर्न भनेर बैठकमा डाकिएको थियो । तर, बैठकमा भने सरकारले साना दल फुटाउन अध्यादेश ल्याउन लागेको भन्दै त्यसलाई रोक्न संसद् बोलाउन समावेदनमा जाने प्रस्ताव राखिएको थियो । त्यसका लागि ठाकुरको पार्टीसमेतबाट हस्ताक्षर लिएर समावेदन गर्ने लक्ष्य प्रतिपक्षको थियो ।
तर, ठाकुरले आफू सत्तापक्षमा रहेको भन्दै विपक्षी गठबन्धनमा बसेर हस्ताक्षर गर्ने प्रस्ताव ठाडै अस्वीकार गरिदिएका थिए । उनले सत्तापक्ष र विपक्षका साझा मुद्दा बन्नसक्ने विपत्तिको व्यवस्थापनसहित विषय भए आफ्नो सहयोग माग्न आग्रह गर्दै समावेदनसहितका काम विपक्षी आफैँले गर्न सुझाव दिएका थिए ।
महन्थको यो सुझावसँगै संसद्को अधिवेशन आह्वानका लागि समावेदन गर्ने विपक्षी गठबन्धनको निर्णय संकटमा परेको छ । प्रधानमन्त्री हुँदा उपेन्द्र यादवको पार्टी फुटाउन निर्णायक भूमिका निर्वाह गरेका प्रचण्डले उनलाई भने बैठकमा बोलाएका थिएनन् । तर, सरकारमा मन्त्रिसमेत लिएर बसेको पार्टी लोसपाका अध्यक्ष ठाकुरलाई भने विश्वासमा लिएर समावेदनका लागि ६९ सिट पुर्याउन गरेको प्रयासमा प्रचण्ड असफल भएका छन् ।
विपक्षी गठबन्धनमा रहेका दल नेकपा माओवादीसँग ३२ सिट, राष्ट्रिय स्वतन्त्र पार्टीसँग २१ सिट र नेकपा एकीकृत समावजादीसँग १० सिट गरी अहिले उनीहरूसँग ६३ सिट छ । त्यसमा प्रभु शाहसहित केही सांसद थपिँदा पनि ६९ नपुग्ने भएपछि प्रचण्डले ठाकुरलाई लिएर समावेदनको प्रयास गरेका हुन् ।
तर, ठाकुरले अस्वीकार गरिदिएपछि समावेदनको निर्णय गरेको विपक्षी गठबन्धनले ‘ध्यानाकर्षण गर्ने’ भन्न थालेका छन् । बैठकमा प्रचण्डले समावेदनका लागि गरेको सहयोगको आग्रह महन्थले अस्वीकार गरेपछि नेकपा एकीकृत समाजवादीका अध्यक्ष माधवकुमार नेपालले विश्वासमा लिन विगतको सहकार्य सम्झाउने प्रयास गरेका थिए ।
“तपाईं र म त जेलमा पनि सँगै थियौँ नि ठाकुरजी,” बैठकमा सहभागी एक नेताले बाह्रखरीसँग भने, “जवाफमा ठाकुरजीले मलाई याद छ, भन्नुभएको थियो ।” त्यसपछि नेपालले ठाकुरलाई अरु को–को थिए याद छ भन्दै प्रश्न गरेका थिए । तर, ठाकुरले भने अरुबारे आफूलाई याद नभएको बताएका थिए ।
त्यसपछि नेपालले अमेरिका भ्रमणमा पनि आफूहरु सँगै रहेको सिम्झाएका थिए । ठाकुरले आफू अमेरिका जाँदा पनि सँगै रहेको कुराबारे जानकार रहेको भन्दै सरकारमा र विपक्षमा पनि विगतमै सहकार्य भएको जवाफ दिएका थिए ।
उनले त्यति भनेर आफू विपक्षी गठबन्धनको बैठक भन्ने जानकारी भएको भए बैठकमै नआउने भन्दै विपक्षी गठबन्धनका लागि आफूले सहयोग गर्न नसक्ने बताएका थिए ।
बैठकले नेकपा एकीकृत समाजवादीका वरिष्ठ उपाध्यक्ष राजेन्द्र पाण्डेको नेतृत्वमा माओवादी केन्द्रका उपमहासचिव शक्ति बस्नेत र रास्वपाका नेता शिशिर खनाल रहेको कार्यदल गठन गरेको छ ।
विशेष अधिवेशन आह्वानका लागि समावेदन गर्न मत नपुग्ने भएपछि कार्यदलले राष्ट्रपति, प्रधानमन्त्री र सभामुखलाई ध्यानाकर्षणपत्र बुझाउन मस्यौदा तयार पार्ने काम गर्नेछ ।
विपक्षी गठबन्धनमा जोडिन चाहने दल र सांसदहरूसँग समन्वयको भूमिका निर्वाह गर्ने पनि जिम्मेवारी पाएको रास्वपा नेता खनालले जानकारी दिए । उनका अनुसार गठबन्धनले कात्तिक ५ गते ध्यानाकर्षणपत्र बुझाउनेछ ।
सरकारमा सहभागी नरहेको दल जनता समाजवादी पार्टी नेपालका अध्यक्ष उपेन्द्र यादवलाई भने प्रचण्डले बैठकका लागि आमन्त्रण समेत गरेका थिएनन् । यादवले आफू सत्तापक्षमा बसिरहेको भन्दै प्रतिपक्षीले बैठकमा बोलाउनु र नबोलाउनुको अर्थ नै नभएको बताए ।
“हामी सत्तापक्षको बेन्चमा छौँ । विपक्षी गठबन्धनको बैठकमा जाने कुरा नै भएन । त्यहाँ बोलाउनु वा नबोलाउनुको कुनै अर्थ छैन,” यादवले बाह्रखरीसँग भने, “सत्तापक्षको बेन्चमा बसिसकेपछि विपक्षी गठबन्धनमा पनि गएर दुईवटा नाउमा खुट्टा राख्ने त कुरा भएन ।”
-1716278128.jpg)
-1723532556.jpg)
-(1)-1723345266.jpg)
