अस्ट्रेलिया । नेपाली विद्यार्थीको रोजाइको देश अस्ट्रेलियामा पनि यतिखेर दसैँको रौनक छ । नेपाली तथा भारतीयहरूले विदेशमा पनि दसैँ मनाउने गर्छन् । करिब दुई लाखको हाराहारीमा नेपाली बसोबास गर्ने अस्ट्रेलियामा पनि नवदुर्गा पूजा र दसैँको चहल पहल बढेको छ । यसपटक अस्ट्रेलियामा आइतबार दसैँ मनाइँदै छ ।  

अस्ट्रेलियामा उच्च शिक्षा अध्ययन गर्ने क्रममा करिब एक लाख नेपाली विद्यार्थी विभिन्न सहरमा छरिएर रहेका छन् । अरू एक लाख विभिन्न स्थायी भिसा, पीआर र नागरिकका रूपमा छन् । 

विद्यार्थीका लागि काम र पढाइका कारण दसैँ खासै रमाइलो बन्न नसके पनि स्थायी रूपमा बसेकाहरूका लागि प्रवासमा पनि यो पर्व महत्वत्त्वपूर्ण बन्दै आएको छ । 

प्रायः नर्सिङ होम र रिटेल सपहरूमा बढी नेपाली कामदार भएकोले दसैँमा बिदा मिलाउन निकै अप्ठ्यारो हुने भएकोले काम सकेर टीका लगाउने सोचमा छन् सिड्नीकी नेपाली विद्यार्थी सदीक्षा खत्री  । “हाम्रो नर्सिङ होममा छ महिना अघिदेखि दसैँको बिदा लिने होड चलेको थियो । तर मैले एक महिनाअघि मात्र भने त्यसैले बिदा पाइएन,” उनले भनिन्, “काम सकेर आउने अनि थकित मुद्रामा तयारी भएर टीका लगाउँदा दसैँको रमाइलो के होला र ?” दसैँको दिन पनि काम गर्नुपर्ने पीडालाई उनले सुनाइन् ।

अर्की नेपाली विद्यार्थी एन्जिला केसी काममा बिदा नदिएकोले दसैँ नरमाइलो हुने बताउँछिन् । “टीकाको दिन बिहानैदेखि रमाइलो गर्ने, टीका थाप्ने खानपिन गर्न पाए त रमाइलो हुन्थ्यो,” उनले भनिन्, “त्यही नपाएपछि काम सकेर नेपालमा आमा बालाई फोन गर्यो, आँशु झार्यो अनि दसैँ सिद्धियो ।” 

नाता गोता र आफन्त भएका विद्यार्थीका लागि टीकाको झल्को मेट्ने ठाउँ पनि हुन्छ तर त्यति पनि नहुनेको लाग विदेशमा पर्व खुसी हैन पीडामा बित्ने अर्की नेपाली विद्यार्थी स्नेहा घिमिरे बताउँछिन् । 

दसैँका लागि नेपालबाट बाबुआमा बोलाएर ग्रानभिलका व्यवसायी प्रकाश भट्टराईले ४० किलोको खसी किनिसकेका छन् । बुबाआमा आएपछि उनको दसैँ दुई दिन अगाडिबाट सुरु भइसकेको छ । “वर्षमा एकपटक आउने चाडमा रमाइलो गर्नै पर्‍यो  । अरू बेला काम गरिएकै छ, प्रकाश भन्छन्,” उनी भन्छन् ।  

यता, सिड्नीको रकडेलस्थित एभरेष्ट बुचरीका महेश प्रसाईं (म्याक्स) पछिल्लो केही दिनदेखि दिनको सरदर एक हजार खसी बिक्री भएको बताउँछन् । “मासु पुर्‍याउन हम्मेहम्मे परेको छ । दसैँमा सबैलाई दिनै पर्‍यो,” म्याक्स भन्छन् । 

म्याक्सले फार्मबाट खसी किनेर प्रशोधन गरेर सिड्नीलगायत विभिन्न सहरहरूमा मासु सप्लाइ गर्छन् । खसीको माग बढेर आपूर्ति समेत गर्न नसकेको अवस्थामा फार्ममा भीड लागेको देख्न सकिन्छ । 

ग्रानभिल नेपाली सोसाइटीले त्यस वरपर बस्ने नेपाली अभिभावकको चाहनाअनुरूप दसैँमा पार्कतिर कार्यक्रम समेत आयोजना गरेको सोसाइटीका अध्यक्ष भीम बस्नेतले बताए । विदेशमा छोराछोरी भेट्न र नातिनातिनीको मुख हेर्न आएका आमाबुबाहरूलाई दसैँमा नरमाइलो नहोस् भन्ने उद्देश्यले अभिभावकलाई केन्द्रित गरेर दसैँमा भेटघाट आयोजना गरेको बस्नेतले सुनाए । नेपालबाट अस्ट्रेलिया पुगेका हजारौँ अभिभावकहरूलाई चाडबाडमा खल्लो नहोस्, एकअर्कामा परिचय र शुभकामना आदानप्रदान हो्स भन्ने हाम्रो उद्देश्यले अस्ट्रेलीयाका विभिनन सहरहरूमा टीका कार्यक्रमको आयोजना गरिएको पर्थका युवा अभियन्ता मनिष सिग्देलले  बताए । 

अस्ट्रेलियाका विभिन्न समुदाय र समाजिक संघसंस्थाले पनि विद्यार्थीको हितमा रहेर दसैँ तथा टीका कार्यक्रमको पनि आयोजना गरेका छन् । पर्थमा नेपाली विद्यार्थीलाई आपसी भाइचाराअभिबृद्धी र दसैँ पर्व मनाउने कार्यक्रमको आयोजना गरिएको एनआरएन पर्थका युवा मिक्की सुवेदीले बताए ।