धनुषा । जिल्ला प्रहरी कार्यालय धनुषाको हिरासत कक्षको ‘भेन्टिलेसन’ भत्काएर नौ थुनुवा फरार भएका छन् । जिल्ला प्रहरी कार्यालयका प्रवक्ता रञ्जन अवालेका अनुसार, हिरासत कक्षमा रहेका १० मध्ये सोमबार बिहान नौ थुनुवा फरार भएका हुन् । फरारमध्ये एकजनालाई पक्राउ गरिएको उनले जानकारी दिए । 

रड काट्न प्रयोग गरिने ह्याक्सो ब्लेडको प्रयोग गरी थुनुवा भेन्टिलेसन काटेर फरार भएका र उक्त औजार उनीहरूको पहुँचमा कसरी पुग्यो भन्ने बारेमा अनुसन्धान भइरहेको प्रवक्ता अवालेले बताए ।

यसैबीच, प्रहरीले फरार अभियुक्तको नाम सार्वजनिक गरेको छ । प्रवक्ता अवालेका अनुसार, फरार हुनेमा अमितकुमार झा, रञ्जित मण्डल, रोशन मण्डल, भास्कर यादव र विशाल मुखिया लागुऔषध मुद्दाका थुनुवा हुन् । सुमित मेस्तर, मनीष मण्डल र विक्की कार्की अभद्र व्यवहार मुद्दाका आरोपित हुन् । रासस