काठमाडौं । बंगलादेशका लागि नेपाली राजदूत घनश्याम भण्डारीले बंगलादेशको अन्तरिम सरकारका प्रमुख सल्लाहकार मुहम्मद युनुससँग शिष्टाचार भेट गरेका छन् ।  

ढाकास्थित युनुसको कार्यालयमा मंगलबार भएको भेटवार्तामा राजदूत भण्डारीले प्रमुख सल्लाहकारमा नियुक्ति भएकोमा बधाई दिँदै नेपालका प्रधानमन्त्री केपी शर्मा ओलीको शुभकामना पत्र हस्तान्तरण गरेका थिए ।

भेटमा राजदूत भण्डारीले बंगलादेश सरकार र जनतासँग नेपाल सरकार र जनताको ऐक्यबद्धता दोहोर्‍याएका थिए ।

बंगलादेशका प्रमुख सल्लाहकारले नेपालको समर्थन र ऐक्यबद्धताको प्रशंसा गर्दै दुई देशबीच राजनीतिक र जनस्तरमा घनिष्ट र सौहार्दपूर्ण सम्बन्ध कायम रहेकोमा सन्तोष व्यक्त गरेका थिए ।

भेटमा नेपाल–बंगलादेशबीचको सम्बन्धलाई थप सुमधुर बनाउने र आर्थिक सम्बन्धलाई नवीकरण गर्ने विषयमा छलफल भएको थियो ।

राजदूत भण्डारीले व्यापार, पारवहन र कनेक्टिभिटीका क्षेत्रमा सम्भाव्यताको खोजी गर्नुपर्नेमा जोड दिँदै नेपाल र बंगलादेशसँगको ऊर्जा सहयोगमा जोड दिएका थिए । 

भारतीय प्रसारण लाइनमार्फत नेपालबाट बंगलादेशमा ४० मेगावाटको जलविद्युत् निर्यातको प्रारम्भिक सुरुआत उपक्षेत्रीय स्तरमा ऊर्जा सहयोग अभिवृद्धिमा परिवर्तनकारी कदम हुने भेटमा उनले बताएका थिए ।

भेटमा क्षेत्रीय तथा अन्तर्राष्ट्रिय मञ्चमा नेपाल–बंगलादेश सहयोगका विषयमा पनि छलफल भएको थियो । उनीहरूले सार्क र बिमस्टेकजस्ता क्षेत्रीय संगठनलाई थप सक्रिय गर्ने कुरामा जोड दिएका थिए ।