काठमाडौं । प्रधानमन्त्री केपी शर्मा ओलीले संयुक्त राष्ट्रसंघको महासभामा ‘पिपुल्स एन्ड प्लानेट’का विषयमा गम्भीर छलफल गर्ने बताएका छन् । सोमबार प्रतिनिधिसभा बैठकलाई उनले आजको समयमा ध्यान दिनुपर्ने विषय नै पिपुल्स एन्ड प्लानेट रहेको बताए ।

प्रधानमन्त्री ओलीले भविष्यको पुस्ता र बालबालिका कसरी सुरक्षित रहन्छन् भन्ने विषयमा छलफल गर्ने उल्लेख गरे । उनले भने, “जब हामी पिपुल्स र प्लानेटको कुरा गर्छौँ, आज ध्यान दिनुपर्ने दुईवटा विषय हुन्, पिपुल्स एन्ड प्लानेट । जुनसुकै कुरा गरौँ, जेसुकै कुरा गरे पनि पिपुल्स एन्ड प्लानेट । प्लानेटको फ्युचर हाम्रो फ्युचर जेनेरेसन, आजको फ्युचर जेनेरेसन । आजको चिल्ड्रेन र भोलिका चिल्ड्रेन । सबै कसरी सुरक्षित हुन्, यी सबै विषयमा छलफल हुँदै छ ।”

उनले नेपालमा जलवायु परिवर्तनका कारण देखिएका समस्या तथा दृष्टिकोण महासभामा प्रस्तुत गर्ने समेत बताए ।

प्रधानमन्त्री ओली राष्ट्रसंघको ७९औँ महासभामा भाग लिन आउँदो असोज ४ गते अमेरिका जाँदै छन् । राष्ट्रसंघको महासभा सेप्टेम्बर १० अर्थात् भदौ २५ गते देखि सुरु भइसकेको छ । महासभा सेप्टेम्बर २५ अर्थात् असोज १२ गतेसम्म चल्नेछ ।