विराटनगर । कोसी प्रदेशसभाका सात संसदीय समितिको सभापति पदमा सातजनाको मनोनयन दर्ता भएको छ ।

प्रदेशसभा सचिवालयले समितिका सभापति छान्न शुक्रबार निर्वाचन मिति तोकेको छ । प्रदेशसभा सचिव गोपालप्रसाद पराजुलीले शुक्रबार दिउँसो २ बजे निर्वाचित सभापतिहरूको शपथ हुने बताए ।

नेपाली कांग्रेस र एमालेले भागबन्डा मिलाएअनुरुप नै समितिको सभापतिमा मनोनयन परेको छ । दुवै दलले तीन–तीन र सार्वजनिक लेखा समिति विपक्षी दल माओवादी केन्द्रलाई छाडिदिएका छन् ।

एमाले सांसद कमला दर्नालले न्याय प्रशासन तथा विधायन, होमबहादुर थापाले प्राकृतिक स्रोत तथा पूर्वाधार  र रामदेव यादवले उद्योग, पर्यटन तथा वातावरण समितिमा मनोनयन दर्ता गराएका छन् ।

कांग्रेस सांसद गयानन्द मण्डलले सामाजिक विकास, खगेश्वरी पौडेलले सुशासन तथा योजना र विनोद बान्तवा राईले अर्थ समितिको सभापतिमा मनोनयन दर्ता गराएको प्रदेशसभा सचिवालयले जनाएको छ ।

सार्वजनिक लेखा समितिको सभापतिमा माओवादी केन्द्रका राजन किरातीले मनोनयन दर्ता गराएका छन् । करिब दुई वर्षदेखि संसदीय समिति नेतृत्वविहीन हुँदा ज्येष्ठ सदस्यले सभापतित्व गर्दै आएका थिए ।