काठमाडौं । नेकपा (माओवादी केन्द्र)का सांसद देवेन्द्र पौडेलले उपसभामुख इन्दिरा रानामगरमाथि महाभियोग लगाउनुले लोकतन्त्रको संरक्षण हुन नसक्ने बताएका छन् । मंगलबार प्रतिनिधिसभा बैठकको विशेष समयमा उनले उपसभामुखलाई हटाउने विषय संसद्‌मा प्रवेश हुनु दुःखदायी भएको बताए ।

यसरी हटाउने प्रवृत्तिले लोकतन्त्रको संरक्षण, विकास र सहकार्यको प्रणाली अगाडि बढ्न नसक्नेमा उनले जोड दिए । “एकजना महिला, जनजाति सहमतिको आधारमा आउनुभएको, सामाजिक सेवामा काम गर्नुभएको उपसभामुखलाई बलियो भनेको दुईतिहाइ सरकारले हटाउने कुरा सदनमा प्रवेश हुने कुरा निकै दुःखदायी छ । यसले लोकतन्त्र अगाडि बढ्न सक्दैन,” उनले भने ।

प्रश्न उठाउनासाथ राजीनामा दिनुपर्ने भए मन्त्रीहरूबारे पनि धेरै प्रश्न रहेका उनले उल्लेख गरे । उनले सरकारका मन्त्रीमाथि भुटानी शरणार्थी, बालुवाटार जग्गा र गिरिबन्धु टी–इस्टेट प्रकरणमा प्रश्न उठाइएको भन्दै राजीनामा दिन तयार हो ? भन्दै प्रश्न गरे ।

“प्रश्न उठेर राजीनामा दिने हो भने दशौँ मन्त्रीका प्रश्न उठेका छन् अहिले, राजीनामा दिन तयार हुनुहुन्छ ? लाउडामा प्रश्न उठ्यो । वाइडबडीमा प्रश्न उठ्यो । भुटानी शरणार्थीमा प्रश्न उठ्यो । बालुवाटार जग्गा प्रकरणमा प्रश्न उठ्यो । गिरिबन्धु टी–इस्टेटमा प्रश्न उठ्यो, राजीनामा दिन तयार हुनुहुन्छ ? छानबिन होस्,” उनले भने ।

उनले उपसभामुख रानामगरलाई नडराउन आग्रह गर्दै माओवादी केन्द्र साथमा रहेको बताए । न्युज एजेन्सी नेपाल