काठमाडौं । नेकपा (एमाले)का सांसद पदम गिरीले राष्ट्रिय स्वतन्त्र पार्टी (रास्वपा)का सांसदलाई कुन लोकतन्त्रका लागि लडेको थियो भनेर प्रश्न गरेका छन् । मंगलबार प्रतिनिधिसभा बैठकमा उनले कुन लोकतन्त्र बचाउन ठेक्का लिएको भन्दै सोधे ।

“कुन लोकतन्त्रका लागि लड्नुभएको थियो ? र, त्यो लोकतन्त्र बचाउने ठेक्का लिनुभएको छ ?,” उनले भने “संसारका महँगा विश्वविद्यालयहरूमा हजारौँ डलर खर्च गरेर पढेका अभिजातवर्गका छोराछोरीले लडेर यो मुलुकमा लोकतन्त्र ल्याएको होइन ।” 

देशका गरिब, श्रमजीवी, उत्पीडनमा परेका जनताहरूले लडेर परिवर्तन ल्याएको उनको भनाइ छ । उनले लोकतन्त्र बचाउन कसैले चिन्ता लिननपर्ने समेत बताए ।

“हिजो जसले ल्याएको हो । तिनले रक्षा गर्छन् । यसलाई संस्थागत गर्ने दायित्व पनि तिनले लिन्छन् । त्यसकारण कसैले चिन्ता गर्नुपर्छ भन्ने ठान्दिनँ,” उनले भने ।

आजको बैठकमा रास्वपाका सांसदहरूले उपसभामुख इन्दिरा रानालाई हटाएर लोकतन्त्रको घाटी निचोर्न लागेको बताएका थिए । सोही विषयमा गिरीले प्रश्नमिश्रित जवाफ दिएका हुन् । 

उनले उपसभामुखलाई राजीनामा दिएर सदनको गरिमा बढाउन पनि सुझाए । उनले उपसभामुख प्रकरण शीर निहुरिएको बताए ।

“उपसभामुखज्यूले आफ्नो पदीय मर्यादा अनुकूलको काम गर्न सक्नु भएन,” उनले भने, “उहाँले मार्ग प्रशस्त गर्दा संसद्को गरिमा उचो हुन्छ ।”