काठमाडौं । ट्राफिक प्रहरीको कारबाहीमा परेमा तत्कालै अनलाइनबाट जरिवाना भुक्तानी गर्न मिल्ने व्यवस्था गर्न लागेको छ । यसका लागि प्रधानमन्त्री तथा मन्त्रिपरिषद्को कार्यालय, गृहमन्त्रालय र नेपाल प्रहरीले संयुक्त रुपमा काम गरिरहेका छन् ।

यससँगै अब ट्राफिक नियम उल्लंघन गरी कारबाहीमा पर्दा त्यतिबेलै जरिवाना तिर्न सकिने भएको हो । काठमाडौं उपत्यका ट्राफिक प्रहरी कार्यालयका प्रहरी उपरीक्षक विश्वराज खड्काले यस निम्ति तयारी अन्तिम अवस्थामा पुगेको जानकारी दिए ।

सवारी तथा यातायात व्यवस्था ऐनमा नै तत्कालै कारबाही गर्नुपर्ने र त्यो सम्भव नभएको अवस्थामा मात्रै २४ घण्टे पुर्जी दिनुपर्ने व्यवस्था छ । सरकारले नियम उल्लंघनकर्ताहरूलाई जरिवाना तिर्दा पर्ने कठिनाई हटाउन यस्तो व्यवस्था गर्न लागेको बताइएको छ ।

‘‘ट्राफिक नियम उल्लंघनमा पर्दा लाइसेन्स हुनेको हकमा त्यतिबेलै अनलाइनबाट जरिवाना तिर्न सकिने व्यवस्था गर्ने काम भइरहेको छ । यसका तयारी लगभग अन्तिम अवस्थामा पुगेको छ । चाँडै नै व्यवस्था लागू हुनसक्छ,” प्रहरी उपरीक्षक खड्काले भने । स्मार्टफोन नहुने र त्यतिबेलै भुक्तानी गर्न नसक्नेको हकमा पुर्जी पनि दिइने उनले बताए ।

ट्राफिक प्रहरीको प्राविधिक र प्रधानमन्त्री कार्यालयको प्राविधिक टिमले यसका लागि काम गरिरहेको छ । अनलाइनबाटै ट्राफिक जरिवाना भुक्तानी गर्न कार्ययोजना भने करिब तीन वर्षअघि नै बनेको बताइएको छ । पुरानै कार्यविधिलाई आधार मानी हाल द्रूत गतिमा काम भइरहेको र चाँडै यो व्यवस्था लागू हुने बताइएको छ ।

जरिवानाबाहेक ट्राफिक प्रहरीले दिने गरेको सचेतना कक्षाबारे भने कुनै निर्णय भइसकेको छैन । जरिवाना कारबाहीमा परेकै ठाउँमा तिर्न मिल्ने भएपछि सचेतना कक्षा लिन जानुपर्ने वा नपर्ने विषय भने टुंगो लागेको छैन । प्रहरी उपरिक्षक खड्काले यस विषयमा पछि नै निर्णय हुने बताए ।