विराटनगर । कोसी प्रदेश निजामती सेवा ऐन, २०७९ मा संशोधनको माग गर्दै कर्मचारीको एक समूहले प्रदेशसभाअगाडि प्रदर्शन गरेको छ ।

सभामा ऐन संशोधन गर्न बनेको विधेयकमाथि छलफल सकिएर संशोधन दर्ता गराउने ७२ घण्टे अवधि मंगलबार (आज) सकिँदै छ । विधेयकमाथिको संशोधनको विरोधमा कोसी प्रदेशका छैटौँ तहका कर्मचारीले ब्यानर बोकेर प्रदेशसभा सचिवालयअगाडि प्रदर्शन गरेका हुन् ।

विधेयकमा नेकपा (एमाले)का प्रदेशसभा सदस्य इन्द्रमणि पराजुली र नेकपा (माओवादी केन्द्र)का गोम्बु शेर्पाले संशोधन प्रस्ताव दर्ता गराएका छन् । स्वतः सातौँ तहमा बढुवा हुने प्रावधान रोक्न खोजिएको कर्मचारीको भनाइ छ ।

विधेयकमा एकपटकका निम्ति ११ वर्ष सेवा अवधि पूरा गरेका कर्मचारी स्वतः बढुवा हुने प्रावधान समेटिएको भए पनि संशोधनमार्फत रोक्न खोजिएको उनीहरूको बुझाइ छ ।

उक्त विधेयकप्रति यसअघि स्वास्थ्य क्षेत्रका कर्मचारीले पनि असन्तुष्टि जनाएका थिए । दशौँ तहका कर्मचारीको बढुवा पदस्थापन सुनिश्चित नभएको भन्दै उनीहरूले सरकारको ध्यानाकर्षण गराएका थिए ।