काठमाडौं । नेपाल उद्योग वाणिज्य महासंघ (एफएनसीसीआई)को टोलीले नवनियुक्त मुख्यसचिव एकनारायण अर्याललाई भेटेर नीतिगत सुधारको माग गरेको छ । भेटमा उनीहरूले अर्थतन्त्रमा सुधार देखिए पनि तीव्र र दिगो विकासका लागि नीतिगत सुधार र स्थायित्व आवश्यक रहेको बताए ।

महासंघका अध्यक्ष चन्द्रप्रसाद ढकालले सुधारका लागि गठन हुने उच्चस्तरीय आर्थिक सुधार आयोगले यसमा काम गर्नुपर्ने र महासंघले यसमा सघाउने बताए । उनले निजी क्षेत्रको मर्यादाक्रमका लागि महासंघले आग्रह गरिरहेकामा यसलाई सकारात्मक रूपमा लिन पनि आग्रह गरे ।

यसैगरी, उनले सर्वसाधारण र व्यवसायीले सेवा लिने क्षेत्रमा सुधारका लागि प्रविधिको उपयोग बढाएर सुशानसनको प्रत्याभूति दिलाउन पनि आवश्यक रहेको उनले औँल्याए ।

जवाफमा मुख्यसचिव अर्यालले निजी क्षेत्रको महत्त्व आफूले बुझेको र लगानी प्रोत्साहित हुने गरी काम गर्ने प्रतिबद्धता व्यक्त गरेका थिए ।

सोही अवसरमा महासंघका वरिष्ठ उपाध्यक्ष अन्जन श्रेष्ठले छिटोछिटो नीति परिवर्तन हुन नहुनेमा जोड दिए ।

त्यस्तै, महासंघका उपाध्यक्ष हेमराज ढकालले अनधिकृत आयात रोक्न र उधारो उठाउने सम्बन्धी कानुन निर्माण गर्न पनि सरकारले पहल गर्नुपर्ने धारणा राख ।