काठमाडौं । नेपाली कांग्रेसका महामन्त्री विश्वप्रकाश शर्माले सरकारको न्यूनतम साझा कार्यक्रम निर्माणमा लाग्नुपर्ने बताएका छन् । आइतबार पार्टीको केन्द्रीय समितिको बैठकमा उनले जनतामा डेलिभरीका लागि सरकारको साझा न्यूनतम कार्यक्रम बनाउन आवश्यक रहेको बताए ।

“अविलम्ब सरकारको साझा न्यूनतम कार्यक्रम निमार्णमा लागौँ,” उनले भने ।

उनले सभापति शेरबहादुर देउवालाई प्रधानमन्त्री केपी शर्मा ओलीलाई विश्वासमा लिनुपर्ने पनि बताए । “जे सहमति भएको छ, त्यो अक्षरशः पालना गरौँ । जे विमति भएको छ, त्यसमा परिपक्वता राख्नुपर्छ,” उनले भने । 

उनले ०८४ सम्म सहकार्य गर्नुपर्ने भएकाले संयततापूर्वक जानुपर्ने बताए । संविधान संशोधनका लागि बृहत्तर सहमति हुनुपर्ने उनको भनाइ छ । उनले सरकार सञ्चालनमा साझा स्वामित्व हुनुपर्ने पनि बताए ।

“सरकारमा रहेको एउटा मन्त्रीजीले अर्को मन्त्रीजीलाई सामाजिक सञ्जालबाट हारगुहार गर्ने विषय सुहाउँदो हुँदैन,” उनले भने । 

उनले सत्ता समीकरणमा कुनै झस्को नपुग्ने गरी चुनावी गठबन्धनको विषयमा निर्णय गर्नुपर्ने पनि बताए ।