काठमाडौं । नेपालले ओमानसमक्ष पाँचवटा प्रस्ताव अघि सारेको छ । मंगलबार काठमाडौंमा सम्पन्न नेपाल–ओमान विदेशमन्त्री स्तरीय द्विपक्षीय बैठकमा नेपालले ओमानसमक्ष ती प्रस्ताव गरेको हो ।

बैठकमा नेपालको नेतृत्व परराष्ट्रमन्त्री आरजु राणा देउवा र ओमानको नेतृत्व विदेशमन्त्री सइद बद्र हमाद हमुद अल बुसाइदीले गरेका थिए ।

बैठकमा नेपालले गरेको पहिलो प्रस्ताव थियो– भैरहवा र पोखरा विमानस्थलमा हवाई उडान सञ्चालन । परराष्ट्रमन्त्री डा. राणाले नेपालका अन्तर्राष्ट्रिय विमानस्थलहरू भैरहवा र पोखरा विमानस्थलमा हवाई उडान सञ्चालनका लागि ओमानसँग आग्रह गरेकी थिइन् ।

ओमानले यसअघि भैरहवामा हवाई उडान सुरु गरेको र पछि बन्द गरेको थियो । हाल नेपाल सरकारले विदेशी एयरलाइन्सहरूलाई थप सुविधा उपलब्ध गराउने निर्णय गरेकाले पुनः उडान सञ्चालनका लागि परराष्ट्रमन्त्री डा. राणाले आग्रह गरेकी थिइन् । यस विषयमा ओमानका विदेशमन्त्री अल बुसाइदीले पुनः विचार गर्ने बताएका थिए ।

थप नेपाली कामदारलाई ओमान लैजान गरेको अनुरोध नेपालले गरेको दोस्रो प्रस्ताव थियो । बैठकमा नेपालले नेपाली श्रमिकहरूको हकहित तथा थप श्रम गन्तव्यबारे कुरा उठाएको थियो । नेपाल पक्षले ओमानको श्रम कानुन र अरु वातावरण राम्रो रहेकाले नेपाली श्रम बजारको राम्रो गन्तव्य हुन सक्ने भन्दै यस विषयमा कुरा उठाएको थियो । 

ओमान पक्षले पनि नेपाली श्रमिकहरू काममा लगनशील र इमान्दार रहेकाले आफ्नो देशले आवश्यकताका आधारमा थप कामदार लैजाने बताएको थियो । यस विषयमा दुई देशबीचमा श्रम सम्झौता गरिने सहमति बैठकमा भएको छ । 

बैठकमा नेपालले गरेको तेस्रो प्रस्ताव थियो– ओमानी पर्यटकको नेपाल आगमन । परराष्ट्रमन्त्री डा. राणाले नेपालको प्राकृतिक सौन्दर्य, नेपालमा सगरमाथा लगायतका विश्वका आठ हजारभन्दा अग्ला हिमालहरू एवं विश्व सम्पदा सूचीमा सूचीकृत सम्पदाहरूबारे ओमानका समकक्षीलाई जानकारी दिएकी थिइन् ।  

यसैकारण नेपालको पर्यटकीय सम्भावना धेरै रहेकाले ओमानी पर्यटकलाई नेपाल पठाउन उनले आग्रह गरेकी थिइन् । 

बैठकमा नेपालले गरेको चौथो प्रस्ताव थियो– नेपालको पर्यटन क्षेत्रमा लगानी । परराष्ट्रमन्त्री डा. राणाले संयुक्त रूपमा केही गर्न सकिने प्रस्ताव गर्दै नेपालमा पर्यटनका क्षेत्रमा लगानी गर्न ओमानसँग आग्रह गरेकी थिइन् । 

नेपालले गरेको पाँचौँ प्रस्ताव थियो– जलविद्युत् लगायतका क्षेत्रमा लगानी । बैठकमा परराष्ट्रमन्त्री डा. राणाले नेपालमा जलविद्युत् लगायतका कैयौँ क्षेत्रमा लगानीका धेरै सम्भावना रहेकाले नेपालमा लगानी गर्न आग्रह गरेकी थिइन् ।   

बैठकपछि परराष्ट्रमन्त्री डा. राणाले पत्रकारहरूलाई संक्षिप्त प्रतिक्रिया दिँदै नेपाल र ओमानबीचको सम्बन्धलाई थप प्रगाढ बनाउने विषयमा कुराकानी भएको बताइन् । 

उनले नेपाल र ओमान दुवै तर्फका लगानी तथा अन्य आदानप्रदानका सम्भावना र चासोका धेरै विषयमा कुरा गरेको र दुई देशबीच श्रम, स्वास्थ्य, पर्यटन र परराष्ट्र मामिलाका सम्बन्धमा छिट्टै सम्झौताको तयारी भएको पनि जानकारी दिइन् । नेपालको पर्यटन क्षेत्रमा लगानी गर्न ओमान इच्छुक रहेको जानकारी पनि मन्त्री डा. राणाले दिएकी थिइन् । 

मंगलबार भएको द्विपक्षीय बैठकमा नेपाल र ओमानको द्विपक्षीय हित, सम्बन्ध विस्तार र साझा चासोका विविध विषयमा कुराकानी भएको थियो । 

बैठकमा हवाई कनेक्टिभिटी, श्रमसमबन्धी विषयहरू, लगानी, पर्यटन, कूटनीतिक आदानप्रदान एवं आवश्यक सबै प्रकारका सहयोग र समन्वयका विषयमा छलफल भएको थियो ।