काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले सरकारबाट बाहिरिनुपरेपछि नेकपा (माओवादी केन्द्र)ले प्रतिगमनको हल्ला चलाएको बताएका छन् । शनिबार काठमाडौंमा तमु सञ्चारकर्मी संघ नेपालले आयोजना गरेको कार्यक्रममा उनले नेपाली कांग्रेस र नेकपा (एमाले) मिल्दा प्रतिगमन हुन्छ भन्ने हल्ला चलाएर माओवादीले सरकारबाट हट्नुपर्दाको पीडा पोखेको बताएका हुन् ।

पटक–पटक सरकार परिवर्तनको प्रयोग भएपछि मुलुकमा स्थिरता कायम गर्न ठूला दुई दल मिल्नुपरेको उनले जिकिर गरे । उनले मुलुकको परिवर्तनमा सबै दलको भूमिका महत्त्वपूर्ण रहेको बताए । उपलब्धि मास्ने काम कसैले नगर्ने उनले स्पष्ट पारे ।

गुरुङले कुनै दलको स्पष्ट बहुमत नआउँदा मुलुकमा देखिएको अस्थिरता अन्त्य गर्न निर्वाचन प्रणाली परिवर्तनको बहस चल्नु स्वाभाविक भएको तर्क गरे । यसैका कारण कोही आत्तिनुपर्ने अवस्था नरहेको उनले बताए । आवश्यकताअनुसार संविधान संशोधन गर्नुपर्दा सबैको सहमतिका साथ अघि बढ्ने उनले उल्लेख गरे ।

मन्त्री गुरुङले संविधानमा सबैको अधिकारका विषय रहेता पनि यसलाई व्यवहारमा लागु गर्न नीति, कानुन आवश्यक रहेको बताए । यसतर्फ सबैले ध्यान दिनुपर्ने उनको भनाइ थियो । हिमालयन टेली भ्वाइस