काठमाडौं । नेकपा (माओवादी केन्द्र)मा कमिटीको आकार सानो बनाउनुपर्ने प्रस्ताव आएको छ । सोमबार पेरिसडाँडामा बसेको स्थायी कमिटी बैठकमा बोल्ने नेताहरूले कमिटीको आकार घटाउनुपर्ने सुझाव राखेको प्रवक्ता अग्नि सापकोटाले जानकारी दिए । 

“पार्टी कमिटी आत्मालोचना गर्न पनि धौधौ हुने ठूला भए । कमिटी सानो बनाउनुपर्छ,” नेताहरूको सुझाव सुनाउँदै उनले भने । 

पार्टी नेतृत्वको विषयमा भने वैचारिक, राजनीतिक, सांगठनिक, विधिगत छलफलतिर जानुपर्ने सुझाव आएको उनले सुनाए । 

“नेतृत्वको सवालमा वैचारिक, राजनीतिक, सांगठनिक, विधिगत छलफलतिर जानुपर्छ भन्ने छ । सबैको सामूहिक नेतृत्वको केन्द्रीकृत अभिव्यक्ति,” उनले भने, “त्यसको अभिव्यक्ति भनेको प्रचण्डबाट मात्रै हुन्छ भन्ने कुरा राख्नुभएको छ ।”  

माओवादीको स्थायी कमिटी बैठक शुक्रबारबाट जारी छ । भोलि बिहान ११ बजे पनि बैठक बस्ने सापकोटाले जानकारी दिए । बैठकमा नेताहरूलाई बोल्नका लागि २० मिनेटको समय तोकिएको छ ।