काठमाडौं । धितोपत्र दोस्रो बजार मापक नेप्से परिसूचक सोमबार ४०.७६ अंकले बढेको छ । नेप्से १.४७ प्रतिशतले बढेर २७९६.३८ को विन्दुमा पुगेको हो ।

यस दिन ४९ करोड ७७ लाख तीन हजार ७३० कित्ता सेयर २१ अर्ब ८६ करोड ४९ लाख ९२ हजार २७७ रुपैयाँमा कारोबार भएको छ ।

सबैभन्दा धेरै होटेल तथा पर्यटन क्षेत्रका कम्पनीका लगानीकर्ताले कमाएका छन् । यस क्षेत्रको समूहगत सूचक ६.६९ प्रतिशतले बढेको छ । यस्तै, ‘अन्य’ तथा व्यापार क्षेत्र पाँच प्रतिशतले बढेको छ भने, हाइड्रो, इन्भेस्टमेन्ट र जीवन बिमा क्षेत्रको समूहगत सूचक पनि तीन–तीन प्रतिशतले बढेको छ ।

निर्जीवन बिमा क्षेत्र एक प्रतिशतले बढ्दा अन्य ६ उपसमूहको समूहगत परिसूचक घटेको छ । नेपाल स्टक एक्सचेञ्च नेप्सेका अनुसार आठ कम्पनीको सेयर मूल्य सर्वाधिक १० प्रतिशतले बढेको छ । सबैभन्दा धेरै गुमाउनेमा नेपाल फाइनान्स लिमिटेडको सेयर मूल्य १० प्रतिशतले घटेको छ ।

सोमबार १६३ कम्पनीको सेयर मूल्य बढेको छ भने, ७८ को घट्दा एकको स्थिर छ ।