विराटनगर । नेकपा (एमाले) विराटनगर महानगर कमिटीका सचिव रोहित कोइरालाले वडा नं ५ का अध्यक्ष राजेश गिरीलाई साउन १६ गते सचेत गराइएको पत्र पठाए । पत्रको भाषा अपमानजनक र पार्टी नीतिविपरीत भएको भन्दै गिरीले त्यसको प्रतिवाद गरे । उनी ‘आफन्तको मरिमराउमा सहभागी हुन गएकै दिन डाकिएको’ बैठकमा अनुपस्थित थिए । 

पार्टीका जिल्ला अध्यक्ष बाबुराम कार्की र सचिव रविन थापा उपस्थित बैठकमा अनुपस्थित भएको भन्दै कोइरालाले ‘नियतबस उपस्थित नभएको पइएकोले अब आइन्दा यस्ता क्रियाकलाप सचेत गराउँदै दुई दिनभित्र लिखित पत्र पठाउन’ निर्देशन दिएका थिए ।  

बैठकमा अनुपस्थित भएको कारण देखाएर कोइरालाले ‘दुई दिनभित्र लिखित जवाफ दिन निर्देशन’ दिएका थिए । तर, गिरीले चिठीको जवाफ दिएनन् । उनले पार्टी कार्यालय पाञ्चाली पुगेर जिल्ला इञ्चार्ज, पार्टीका जिल्ला अध्यक्ष र महानगर कमिटी कोइराला सहभागी छलफलमै चिठी च्याति दिए ।

“पार्टी विधि विधानविपरीत एकपटक त्यसमा पनि परिस्थितिजन्य कारण अनुपस्थित हुँदा स्पष्टीकरण सोध्नै मिल्दैन,” गिरीले भने, “मलाई कुन विधि प्रक्रियाअनुसार चिठी काटेको हो भन्दै सचिवकै अगाडि चिठी च्यातेर फ्याकिदिएँ । जिल्ला अध्यक्ष बाबुराम कार्की, इन्चार्ज तथा केन्द्रीय सदस्य जीवन घिमिरे पनि छलफलमा हुनुहुन्थ्यो ।” 

महानगरले अपमानजनक ढंगले पत्र पठाएर गलत गरेको र यसबारे आफूसँग छलफल नगरेको इन्चार्ज घिमिरेले बताउँदै स्पष्टीकरण दिइरहनु नपर्ने बताएका थिए ।  

आफ्नो ‘अनुकूलको मानिस भएन’ भनेर अहिले महानगर कमिटीका सचिवसहितका नेताले ‘कारबाही आतंक मच्चाएको’ उनले सुनाए । तीनवटा बैठकमा अनुपस्थित भए स्पष्टीकरण सोध्न सकिने र त्यसबारे पार्टीलाई जानकारी गराउनुपर्ने एमाले विधानमा रहेको गिरीले सुनाए । 

महानगर कमिटीका सचिवले वडा नं ५ का राजेश गिरी, वडा नं १२ का भानुभक्त पाठक, वडा नं ९ का अन्ताज आलम र १० का गोविन्द ढुंगानालाई चिठी पठाएका थिए । तीमध्ये वडा नं ९ र १० का अध्यक्षले भने सामान्य स्पष्टीकरण बुझाएका छन् ।

एमाले महानगर कमिटीमा कारबाही र स्पष्टीकरणको श्रृंखला भने विराटनगर–३ स्थित मानगढ खानेपानी समितिको निर्वाचनबाट सुरु भएको हो । त्यो निर्वाचनमा महानगर कमिटीका अध्यक्ष सागर थापाले ‘पार्टीले लाइन दिएकाभन्दा फरक उमेदवारलाई सघाएको’ भन्दै पार्टी जिल्ला कमिटीले ‘पार्टी सदस्य समेत नरहने गरी कारबाही गरेको’ घोषणा गरेयता झन् बढेको हो । 

एमाले मोरङका निवर्तमान अध्यक्ष ऋशिकेष पोख्रेलले अघि सारेको उमेदवारलाई स्वीकार नगरेर फरक व्यक्तिलाई उमेदवार बनाएको थापामाथि आरोप छ । उनीसँगै उपसचिव नवराज नेपाल र विराटनगर ३ नम्बर वडा कमिटी अध्यक्ष लालमणि भट्टराईलाई कारबाही गरिएको छ ।  

यसबारे छानबिन गर्न एमाले मोरङकी उपसचिव शान्ति भुजेलको संयोजकत्वमा रविन थापा र काजीबहादुर बस्नेत सदस्य रहेको समिति गठन भएको थियो । समितिले कारबाही गर्न सिफारिस गरेको थियो । तर, बस्नेतले भने फरक मत राख्दै निर्णयमा हस्ताक्षर गरेनन् ।

गत असार १७ गते बसेको प्रदेश कमिटी बैठकले प्रदेश सचिव राजकुमार भण्डारीको नेतृत्वमा छानबिन समिति बनाएको थियो । शनिबार बसेको एमाले मोरङको संगठन कमिटी पदाधिकारी बैठकले महानगर कमिटी अध्यक्ष थापालाई गरेको कारबाहीलाई अनुमोदन गर्ने निर्णय गरेको थियो । 

पदाधिकारी बैठकमा समेत थापालाई कारबाहीको सिफारिस गर्नेको बहुमत छ । सिफारिस समितिका संयोजक शान्ति भुजेल संगठन कमिटीका उपाध्यक्ष हुन् भने सदस्य रविन थापा सचिव हुन् । जिल्ला संगठन कमिटीका अध्यक्ष कार्की पनि थापाका विपक्षमा छन् । पदाधिकारीमा उपसचिहरू सन्तोष साह र सोम थापा छन् । थापा र साह दुवै यस प्रकरणमा मौन छन् । एमाले महानगर कमिटीमा नेता पर्शुराम बस्नेत र सागर थापा गुटबीच विवाद रहँदै आएको छ ।