![कीर्तिपुरमा रंगशाला निर्माणबारे प्रधानमन्त्रीले गरे त्रिविका पदाधिकारीसँग छलफल](https://12khari.top/uploads/posts/KP-Sharma-Oli-1721921500.jpg)
काठमाडौं । प्रधानमन्त्री केपी शर्मा ओलीले कीर्तिपुर खेल मैदानलाई सुविधासम्पन्न रंगशाला बनाउने विषयमा आज त्रिभुवन विश्वविद्यालयका पदाधिकारीसँग छलफल गरेका छन् ।
प्रधानमन्त्री तथा मन्त्रिपरिषद्को कार्यालय सिंहदरबारमा आज प्रधानन्त्री ओलीले त्रिविका उपकुलपति प्राडा केशरजंग बराल, शिक्षाध्यक्ष प्राडा खड्ग केसी र रजिस्ट्रार प्राडा केदारप्रसाद रिजालसँग छलफल गरेका हुन् ।
"आज त्रिभुवन विश्वविद्यालयका उपकुलपति, रेक्टर र रजिस्ट्रारसँग कीर्तिपुरस्थित क्रिकेट मैदानमा रंगशाला निर्माण गर्नको लागि लिजमा जग्गा उपलब्ध गराउने विषयमा छलफल भयो । छलफलमा सिनेट बैठक र ग्रेसलिस्टको विषयमा पनि कुराकानी भयो," ओलीले फेसबुकमार्फत भनेका छन् ।
गत असार ३१ गतेको मन्त्रिपरिषद्को पहिलो बैठकले कीर्तिपुर खेल मैदानलाई सुविधासम्पन्न रंगशाला बनाउने निर्णय गरेको थियो । रंगशालामा दर्शक बस्न प्यारापिट, रात्रिकालीन खेलकुदका लागि ‘ल्फडलाइट’ र आवश्यक संरचना बनाउने सरकारको निर्णय छ । उक्त कामका लागि तीन सय दिनको समय सीमा निर्धारण गरिएको छ ।