काठमाडौं । नेकपा (माओवादी केन्द्र)का सांसद वर्षमान पुनले मौद्रिक नीति निजी क्षेत्रको चासो सम्बोधन गर्ने गरी ल्याउनुपर्ने बताएका छन् । नयाँ बानेश्वरस्थित संघीय संसद् भवन परिसरमा सोमबार सञ्चारकर्मीसँग उनले निजी क्षेत्रले संकुचनको महसुस गरिरहेको भन्दै मौद्रिक नीतिमा लचकता अपनाउनुपर्ने बताएका हुन् ।

“...वित्तीय नीति र मौद्रिक नीति एकार्काका पूरक हुन् । त्यही रूपले आउनुपर्छ । समयमै आउनुपर्छ,” उनले भने, “खासमा अहिले निजी क्षेत्रले संकुचनको महसुस गरिराखेको छ, केही कडाइको महसुस गरिराखेको छ । केही लचकता गर्नुपर्छ ।”

घरजग्गा र सेयर कारोबारका अप्ठ्यारा फुकाउनुपर्नेमा उनले जोड दिए । लगानीयोग्य पुँजी बैंकमा थुप्रिएर बसेको भन्दै उनले मौद्रिक नीतिले त्यसलाई चलायमान बनाउनुपर्ने बताए । “घरजग्गा कारोबार, सेयर कारोबारमा रहेका क्यापिङहरू, अप्ठ्याराहरूलाई फुकाउनुपर्छ,” उनले भने, “लगानीयोग्य पुँजी पर्याप्त छ, बैंकहरूमा थुप्रिएर बसेको छ । त्यसलाई चलायमान बनाउनलाई मौद्रिक नीतिले सघाउ पुर्‍याउनुपर्छ ।”

नेपाल राष्ट्र बैंकको स्वायत्तता र विज्ञतामा सरकारले हस्तक्षेप गर्न नहुने उनले उल्लेख गरे । “राष्ट्र बैंकले स्वतन्त्र ढंगले निजी क्षेत्रका चासोहरूलाई सम्बोधन गरोस् । सरकारले लिएको लिएको वित्तीय नीतिलाई समर्थन गर्ने ढंगले आओस् । यसमा कुनै स्वार्थ समूह हाबी नहोस्,” उनले भने । न्युज एजेन्सी नेपाल