काठमाडौं । नेकपा (एमाले)का सांसद दामोदर पौडेलले उपसभामुख इन्दिरा रानामगरको पत्र नै मानव तस्करी गरेको प्रमाण भएको जिकिर गरेका छन् । 

आइतबारको प्रतिनिधिसभा बैठकको आकस्मिक समयमा उनले उपसभामुखले भिसाका लागि सिफारिस गरेको पत्र मिडिया ट्रायल नभएको दाबी गरे । “मिडिया ट्रायल हो कि के हो पत्र आफैँ बोल्छ । स्वयं उपसभामुखको विज्ञप्ति पनि बोल्छ । मैले मानव तस्करी गरेको हो भन्ने बोल्छ त्यो पत्रले,” उनले ठोकुवा गरे, “लेनदेन छ भन्ने विज्ञप्तिमा आयो । यस्तो उपसभामुख चाहिएको होइन । संवैधानिक परिषद्को सदस्य चाहिएको होइन । जसले मान्छे अनेक नाममा लेटरप्याडको प्रयोग गरेर अनेकौँ नाममा मान्छे बेचबिखन गर्ने । उहाँलाई करुणा जाग्यो...।” 

इजरायलको घटनामा, रुसमा नेपालीको मृत्यु हुँदा, भारतमा मान्छे अलपत्र पर्दा विज्ञप्ति आयो भनि प्रश्न गरे । सरोकार नराख्ने मानिसका लागि भिसाको सिफारिस गरेको भनि प्रश्न गरे । संसद्ले नछाड्ने चेतावनी पनि दिए । “महिलाहरूको सम्मेलनमा जान पुरुषलाई सिफारिस गरियो । के हो यो ? दुरुपयोग नगर्नुस् । अरु काण्ड यसमा नजोड्नुस् । सरकारले छानबिन गर्ने आफ्नो ठाउँमा छ । हामी छोड्नेवाला छैनौँ,” उनले भने । 

रास्वपाको विज्ञप्ति आपत्तिजनक र आशंकित पार्ने खालको भएकाले तुरुन्त छानबिन गर्न ध्यानाकर्षण गराए ।