![एकीकृत समाजवादीमा केन्द्रीय सदस्य बन्न हानथाप](https://12khari.top/uploads/posts/ekikrit-samajwadi1-1721290815.jpg)
काठमाडौं । नेकपा (एकीकृत समाजवादी)मा आकांक्षी धेरै हुँदा केन्द्रीय सदस्य छान्न सकस परेको छ । हालै सम्पन्न पार्टीको १०औँ राष्ट्रिय महाधिवेशनबाट अध्यक्ष र महासचिवसहित ९३ केन्द्रीय सदस्य सर्वसम्मत चुनिएका थिए । महाधिवेशनको बन्दसत्रका क्रममा १० दिनभित्र कमिटीले पूर्णता पाउने घोषणा गरिएको थियो । तर, महाधिवेशन सकिएको १३ दिन बित्दा पनि त्यसले पूर्णता पाउने टुंगो छैन ।
गएको असार १६–२१ गतेसम्म काठमाडौंको कमलादीस्थित नेपाल प्रज्ञा–प्रतिष्ठानमा भएको महाधिवेशनबाट अध्यक्षमा माधवकुमार नेपाल र महाचिवमा घनश्याम भुसाललाई सर्वसम्मत चयन गरिएको थियो । सम्मानित नेतामा झलनाथ खनाललाई नै निरन्तरता दिइएको थियो । २९९ मध्ये २०६ केन्द्रीय सदस्य थाती राखेर त्यति बेला कमिटी घोषणा गरिएको थियो ।
महाधिवेशनको बन्दसत्रमा नेता राजेन्द्र पाण्डेले १० दिनभित्र बाँकी केन्द्रीय सदस्य चयन गरिसक्ने बताएका थिए । अध्यक्ष नेपालले पनि हललाई ‘थामथुम’ पार्दै छिट्टै सदस्य टुंग्याउने वचन दिएका थिए ।
महाधिवेशनबाट सर्वसम्मत छानिएको ९३ सदस्यीय केन्द्रीय कमिटीको पहिलो बैठक असार २२ गते बसेको थियो । पार्टी केन्द्रीय कार्यालय आलोकनगरमा बसेको बैठकबाट प्रदेश इन्चार्ज, प्रदेश कमिटीका अध्यक्ष र केन्द्रीय सदस्यलाई समावेशी क्लस्टर मिलाई नाम सिफारिस गर्ने जिम्मेवारी दिइएको थियो ।
पार्टी कार्यालयका सचिव जीवनराम श्रेष्ठका अनुसार, प्रदेशले नाम सिफारिस गरिसकेको छैन । प्रदेशले नाम सिफारिस गरिसकेपछि केन्द्रीय कमिटीको बैठक बसेर थप सदस्यबारे निर्णय लिइनेछ ।
“केन्द्रीय कमिटीलाई पूर्णता दिने अभियानमा नै छौँ । सम्भावित नाम सिफारिस गर्न प्रदेश इन्र्चाज, अध्यक्ष र ९३ भित्रका केन्द्रीय सदस्यलाई जिम्मा दिएका छौँ । उताबाट नाम सिफारिस भएर आइसकेको छैन । त्यो नाम आइसकेपछि केन्द्रीय कमिटी बैठक बसेर निर्णय गर्छौँ,” उनले बाह्रखरीसित भने ।
केन्द्रीय कमिटीले पूर्णता पाएपछि पदाधिकारी चयन गरिनेछ । एकीकृत समाजवादीमा २१ मध्ये १९ पदाधिकारी चयन गर्न बाँकी छ । त्यसपछि स्थायी कमिटी र पोलिटब्युरो सदस्य छानिनेछ ।
सदस्य बन्न हानथाप
एकीकृत समाजवादीमा केन्द्रीय सदस्यको संख्या अघिल्लो कमिटीको तुलनामा केही घट्नेछ । पुरानाको व्यवस्थापन गरी नयाँ सदस्य थप्ने तयारी छ । सोहीअनुसार केन्द्रीय सदस्यका निम्ति विभिन्न मापदण्ड तोकिएको छ ।
निरन्तर काम गरिरहेको, पार्टी सदस्य बन्न मापदण्ड पूरा गरेको, अनुशासन पालना गरेको, यसअघि पाएको जिम्मेवारी पूरा गरेको आदि मापदण्ड रहेको श्रेष्ठले जानकारी दिए । उनका अनुसार, मापदण्डभित्र पर्ने पुराना सदस्य छानिनेछन् । २५–४५ का युवा र महिला, जनजातिबाट नयाँ सदस्य थपिने बताइएको छ ।
एकीकृत समाजवादीभित्र केन्द्रीय सदस्य छनोटमा असन्तुष्टि पनि देखिएको छ । महाधिवेशनबाट केन्द्रीय सदस्य चुनिन नपाएकाले गुनासो गर्दै आएका छन् । यस्तै, सदस्य छनोटका विषयमा रामकुमारी झाँक्री, राजेन्द्र राई, कृष्णकुमार श्रेष्ठलगायत नेताले असन्तुष्टि व्यक्त गरेका थिए ।
अल्पमतको कमिटीले बहुमत सदस्य छान्ने भन्दै कतिपय नेताले नेतृत्वको ध्यानाकर्षण पनि गराएका छन् । असन्तुष्टि सम्बोधन गरिनुपर्ने माग त छँदै छ, आकांक्षी धेरै हुँदा समेत केन्द्रीय सदस्य छान्न सकस भएको एक नेताले बताए ।
“विभिन्न व्यक्तिका असन्तुष्टि पनि समाधान गर्नुपर्नेछ । केन्द्रीय कमिटीमा आउन चाहनेहरू धेरै छन्, तर संख्या सीमित छ । त्यसले गर्दा पनि प्रदेशबाट नाम सिफारिस गर्न विलम्ब भएको छ,” ती नेताले भने ।