काठमाडौं । राष्ट्रिय स्वतन्त्र पार्टी (रास्वपा)की सांसद सोविता गौतमले नवगठित सरकारको समावेशिताप्रति प्रश्न उठाएका छन् । सोमबार प्रतिनिधिसभा बैठकको आकस्मिक समयमा सांसद गौतमले मन्त्रिपरिषद्‌मा संविधानले सुनिश्चित गरेअनुरूपको महिलाको प्रतिनिधित्व नभएको बताइन् ।

त्यस्तै, उनले दलितको प्रतिनिधित्व शून्य रहेको भन्दै उनले सरकारले समावेशितालाई हेर्ने दृष्टिकोण के हो ? भनी प्रश्न गरिन् ।

उनले स्वार्थको द्वन्द्व हुने खालको व्यक्तिलाई मन्त्री नियुक्त गरिएको उल्लेख गर्दै यसप्रति पनि सरकारको जवाफ माग गरिन् । उनले भ्रष्टाचारको मुद्दामा नाम मुछिएर छानबिनमा नाम आएका मन्त्रीबाट सुशासनको अपेक्षा गर्न नसकिने बताइन् ।

"सरकारले यो विषयमा पनि हामीलाई जानकारी दिनुपर्छ । नियामक निकायमाथिको राजनीतिक हस्तक्षेप र त्यहाँमाथिको रजगजबारे सरकारको धारणा के छ ? भ्रष्टाचारको मुद्दामा नाम मुछिएर छानबिनमा नाम आएका मन्त्रीबाट सुशासनको अपेक्षा हामीले कसरी गर्ने ? योबारे पनि सरकारले हामीलाई स्पष्ट पारिदेओस् । हाम्रो गम्भीर चिन्ताको विषय हो," उनले भनिन् ।

उनले मन्त्रीहरूलाई आफ्नो सम्पत्ति विवरण सार्वजनिक गर्न आग्रह पनि गरिन् । सांसद गौतमले समृद्धि र सुशासनको मुद्दामा आफूहरूको पूर्ण सहयोग हुने र भ्रष्टाचारको मुद्दामा निर्मम भएर खरो उत्रिने बताइन् ।