दोधारा चाँदनी । कञ्चनपुरमा गएको साताको अविरल वर्षापछि आएको बाढीका कारण डुबानमा परी विस्थापित भएका परिवार घर फर्किएका छन् । अधिकांश घरका अन्न र लत्ताकपडा सबै भिजेको छ । कतिपयको अन्नपात बाढीले बगाएको छ ।

यहाँका बाढी प्रभावितलाई खानलाउन समस्या भएको छ । महाकालीपारि दोधारा चाँदनी नगरपालिकाका चार वडामा जोगबुडा नदीको बाढी पसेको थियो । दोधारा चाँदनी–८, ९, १० र ३ का बासिन्दा सबैभन्दा बढी समस्यामा परेका छन् ।

घरभित्रका कपडा कतिपय बगेको र केही माटोमा च्यापिएको पीडित बताउँछन् । स्थानीय मंगले सार्कीले घरभित्र भएको अन्न, लत्ताकपडा बाढीले बगाएपछि साँझ–बिहानको छाक टार्न मुस्किल परेको बताए । “भाँडाकुँडा, अन्नपात र लत्ताकपडा सबै बगाइदियो । साँझ–बिहान के खाने, तीन दिन भयो केही खाएका छैनौँ,” उनले भने, “खेत पनि लेदोले पुरेको छ । यस्तो अवस्थामा पनि राज्यबाट कुनै सहयोग पाएका छैनौँ ।”

दोधारा चाँदनीका चम्पा सार्कीको घर बाढीले भत्काएको छ । बाढीले घर भत्काएपछि खुला आकाशमा पालको सहारा बस्नुपरेको उनले बताइन् । “बाढीले केही राखेन । अन्नपात, लत्ताकपडा सबै बगाइदियो,” उनले भनिन्, “दराज र सोफा लेदोले पुरिएको थियो । घरभित्र रहेको सुन र केही नगद बाढीले लगेको छ ।”

टापुको बस्ती कुतियाकभरमा पनि बाढीले ठूलो नोक्सानी गरेको छ । बाढीले केही घरमा पूर्ण क्षति भएको छ । सामान्य क्षति भएका घरका सबै फर्किइसकेका छन् । घर भत्केका परिवारका सदस्य कोही आफन्तकामा छन् भने कोही नेपाली सेनाले निर्माण गरेको ‘सेफ हाउस’मा छन् ।

रातिको समयमा अचानक बाढी बस्तीमा पसेपछि ज्यान जोगाउनै मुस्किल भएको लक्ष्मी सुनारले बताइन् । “राति १ बजेतिर प्रहरी आएर हामीलाई उद्धार गरेका हुन्,” उनले भनिन्, “ज्यान त जोगायो, अन्न र पशुचौपाया जोगाउन सकिएन ।” उनले बाढीले अन्न र लत्ताकपडा सबै बगाएपछि खानलाउन समस्या भएको बताइन् ।

बाढी र डुबानले दोधारा चाँदनी नगरपालिका, भीमदत्त नगरपालिका, बेलडाँडी गाउँपालिका र बेलौरी नगरपालिकामा ठूलो संख्यामा नागरिक विस्थापित भएका थिए । उक्त क्षेत्रमा पूरै लेदोले भरिएर खेतबारी ढाकिएको छ ।

जिल्लाको दक्षिणी क्षेत्र बेलौरी नगरपालिकाको कलकत्ता र भुँडामा पनि डुबानका कारण ठूलो क्षति भएको छ । जिल्लाभर क्षतिको विवरण संकलन भइरहेको जिल्ला प्रशासन कार्यालयले जनाएको छ । रासस