काठमाडौं । प्रतिपक्ष दल राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर (ज्ञानेन्द्र) शाहीले ७२ घण्टामा निर्मला पन्तको हत्यारा पत्ता लगाउँछु भनेर भोट मागेको होइन ? भन्दै गृहमन्त्री रवि लामिछानेलाई प्रश्न गरेका छन् ।

आइतबार प्रतिनिधिसभा बैठकको विशेष समयमा उनले १२४ दिन सरकारमा हुँदा खै हत्यारा पत्ता लगाएको ? भन्दै थप प्रश्न गरे । जीबी राईलाई पक्राउ गरेर ल्याए गृहमन्त्री लामिछानेलाई सदनमा फूलमाला लगाएर स्वागत गर्ने उनले उद्घोष नै गरे ।

उनले गृहमन्त्री लामिछाने प्रधानमन्त्री पुष्पकमल दाहाल ‘प्रचण्ड’ पथको पछाडि लागिपरेको टिप्पणी गरे । “ठ्याक्कै कपी गर्नुभएको छ गृहमन्त्रीले । हुन त सँगसँगै हुनुहुन्छ सरकारमा,” उनले भने, “फाइल खोल्ने भनेपछि मेरो सरकार ढाल्यो रे ! अझै सात दिन छ, फाइल खोलौँ । झ्याम कि झ्याम पक्रेर जेल हालौँ । हामी साथ र सहयोग गर्छौँ ।”

उनले फाइल खोल्नुस् न भन्दै जनतालाई कहिलेसम्म भ्रमित पार्ने भनी प्रश्न गरे । उनले क्यान्टोनमेन्ट घोटालामा कसको संलग्नता छ, रोस्ट्रममा उभिएर जवाफ दिन गृहमन्त्रीलाई अनुरोध गर्दै भने, “पुरानाले देशलाई ३३ वर्षदेखि लुटे, यिनीहरूका विरुद्ध सडक र संसद्बाट खडा हुनुपर्छ भनेर जनताले जनमत दिएको हो ।”

उनले संविधान संशोधन र परिवर्तन गर्नुपर्ने भन्दै संविधान गीता, कुरान, बाइबल नभएको उल्लेख गरे । संविधान देशको हितमा भए अघि बढाउने र नभए धाराहरू हटाएर उपयुक्त बनाउनुपर्ने धारणा राखे ।