काठमाडौं । नेकपा (माले)का महासचिव सीपी मैनालीले मुलुक विदेशीको चक्रव्यूहमा फसेको टिप्पणी गरेका छन् । दलहरूलाई प्रयोग गरेर नेपाललाई विदेशीले आफ्नो नियन्त्रणमा लैजाने रणनीतिक लक्ष्य बनाएको उनको जिकिर थियो ।

शनिबार काठमाडौंमा पुष्पलाल अध्ययन समाजले आयोजना गरेको एक कार्यक्रममा उनले मुलुकलाई विदेशीको नियन्त्रणबाट मुक्त गर्न नेपालका कम्युनिस्ट पार्टीले आफ्नो विगतको समीक्षा गरेर अघि बढ्नुपर्नेमा जोड दिए ।

मुलुकमा तत्काल जनवाद आउने सम्भावना नभएको उनले उल्लेख गरे । कम्युनिस्टले आफ्ना कमजोरी सुधार गर्दै अघि बढे समाजवाद निर्माणको आधार भने बनाउन सक्ने उनको भनाइ थियो ।

महासचिव मैनालीले नेपालमा कम्युनिस्ट शक्तिबीच एकता भइहाल्ने अवस्था नरहेको पनि बताए ।

उक्त कार्यक्रममा सीपी मैनालीको भनाइ पढ्नोस्–
अब दलहरूलाई प्रयोग गरेर नेपाललाई विदेशीको नियन्त्रणमा लैजाने दोस्रो रणनीतिक लक्ष्यमा लागेको छ । यस्तो खालको कमजोरीहरू हाम्रोमा छन् । अहिले तत्कालै जनगणतन्त्र, तत्कालै समाजवाद आउने कुरा त म देख्दिनँ, तर अहिले तत्कालै एउटा फेरि एउटा राजनीतिक परिवर्तनको आवश्यकता देखिएको छ । त्यसका कार्यक्रमहरू, त्यसका लक्ष्यहरू, विधिहरू के हुन सक्लान्, अहिले मैले भन्न पाइनँ । अहिले मुलुक विदेशीहरूको चक्रव्यूहबाट मुक्त भएर स्वतन्त्र समाजको रूपमा अघि जानसक्छ । देशमा जनसत्ता आउन सक्ला र पुँजीवादविरोधी समाजवाद निर्माण गर्ने परिस्थितिको सिर्जना हुन सक्ला । न्युज एजेन्सी नेपाल