काठमाडौं । राष्ट्रिय स्वतन्त्र पार्टीकी सांसद डा. चन्दा कार्कीले बालविवाह गर्ने र गराउने दुवैलाई कडा कारबाही गर्नुपर्ने माग गरेकी छन् । बिहीबार प्रतिनिधिसभा बैठकको विशेष समयमा बोल्दै सांसद कार्कीले समाजमा बालविवाह ठूलो रोगको रूपमा रहेको भन्दै गर्ने गराउनेलाई कडाभन्दा कडा कानुनी कारबाही गरिनुपर्ने बताएकी हुन् । 

उनले संविधान र कानुनमा बालविवाहलाई बर्जित गरिएको भए पनि कानुन कार्यान्वयन हुन नसकेको बताइन् । अहिले पनि बालविवाहको दर ३५ प्रतिशत रहेको र मधेस प्रदेशमा त झनै ४२.४ प्रतिशत रहेको भन्दै उनले यसलाई पूर्णरूपमा रोक्नुपर्ने बताइन् । 

कुनै कानुनी कमजोरी भए परिमार्जन गर्न पनि सरकारलाई आग्रह गर्दै सांसद कार्कीले कानुन कार्यान्वयनमा फितलोपन देखाउने प्रशासनलाई पनि कारबाही गर्नुपर्ने बताइन् । 

“बालविवाह गर्ने, गराउनेलाई कडा कारबाही गरियोस् । कार्यान्वयमा फितलोपन देखाउने प्रशासनपंक्तिलाई पनि कारबाहीको दायरामा ल्याइयोस् । बालविवाहविरुद्धको लडाइँलाई नारामा मात्र सीमित नराखियोस्,” उनले भनिन् । सांसद कार्कीले सरकारले शिक्षा र रोजगारीमा लगानी बढाउनुपर्ने बताइन् । उनले विपन्न वर्गलाई सहायता कोषको व्यवस्था गर्न सरकारको ध्यानाकर्षण गराइन् ।