काठमाडौं । प्रमुख प्रतिपक्ष दल नेपाली कांग्रेसका सांसद कुसुमदेवी थापाले भौतिक पूर्वाधारमन्त्री रघुवीर महासेठलाई नेपालको भू–भागको विषयमा अनभिज्ञता रहेकाे भन्दै भ्रमणका लागि निम्ताे समेत दिएकी छन् । 

आइतबार प्रतिनिधिसभा बैठकको शून्य समयमा बोल्दै उनले भौतिक पूर्वाधार मन्त्रालयको बजेटसम्बन्धी रातो किताब हेर्दा सोही अनुभूति हुने बताइन् । बजेट विनियोजनमा अनुदार मन्त्री बनेको भन्दै उनले रुकुम पूर्वमा त्यहाँको भूगोल र अवस्था अवलोकन गर्न मन्त्री महासेठलाई निमन्त्रणा दिइन् । 

“जब भौतिक पूर्वाधार मन्त्रालयको रातो किताब हात पर्‍यो, मनमा एउटा गम्भीर प्रश्न उब्जियो । यो देशको मन्त्रीलाई नेपालको भूगोल, त्यहाँको अवस्थाको बारेमा यतिसम्म अनभिज्ञता पनि हुन सक्छ र ? देशको भू–भाग र अवस्थाबारे सामान्य जानकारी समेत नहुने कस्तो मन्त्री देशले पाएछ ?” उनको प्रश्न थियो । 

सांसद थापाले १६५ निर्वाचन क्षेत्र रणनैतिक सडक शीर्षकमा छुट्याइएको बजेटमा रुकुम पूर्व जिल्लालाई अलग राख्नुले त्यहाँका जनताले के भनेर बुझ्ने भन्दै प्रश्न गरिन् । उनले रुकुम पूर्व जिल्लालाई राज्यले कहिलेसम्म उपेक्षामा राख्ने हो भन्दै सरकारको ध्यानाकर्षण गराइन् ।